لاہور: (دنیا نیوز) معروف سینئر اداکار محمود اختر نے کہا ہے کہ مغربی فنڈنگ پاکستانی ڈراموں کو تباہ کر رہی ہے۔
پاکستان شوبز انڈسٹری کے معروف اداکار محمود اختر نے حال ہی میں نجی ٹی وی کے پروگرام میں شرکت کی جہاں انہوں نے پاکستانی ڈرامہ انڈسٹری میں مبینہ مغربی ایجنڈے اور غیرملکی فنڈنگ کے ذریعے پھیلنے والے اثرات پر سنگین خدشات کا اظہار کیا ہے۔
محمود اختر نے کہا ہے کہ میں نے ہر دور کی تبدیلی دیکھی ہے، مگر پہلے ہمارے ڈرامے سچے اور معیاری ہوتے تھے، ان میں کہانی کا وزن ہوتا تھا، بعد میں جب ڈائجسٹ کہانیاں آئیں تو معیار گر گیا اور اب تو ایک نیا فراڈ چل رہا ہے۔
انہوں نے کہا ہے کہ مغرب سے مخصوص موضوعات پر ڈرامے بنانے کے لیے فنڈنگ ہو رہی ہے اور یہ سب ہماری اخلاقیات کو برباد کر رہا ہے، کوئی اس پر توجہ نہیں دے رہا بلکہ ڈرامہ ساز اور ناظرین دونوں مطمئن ہیں، اگر یہ سلسلہ چلتا رہا تو آنے والے وقت میں ہمارا معاشرہ کس رخ پر جائے گا؟
سینئر اداکار نے افسوس کا اظہار کرتے ہوئے کہا ہے کہ پاکستانی ڈرامے اپنی اصل روح کھو چکے ہیں اور مغربی ایجنڈے کے تابع بنتے جارہے ہیں جس سے ہماری ثقافت اور معاشرتی اقدار کو شدید نقصان پہنچ رہا ہے۔
