لاہور: (دنیا نیوز) پاکستان شوبز انڈسٹری کی ابھرتی ہوئی اداکارہ قدسیہ علی نے انکشاف کیا ہے کہ انہوں نے ایک شخص سے محبت کی لیکن بعد ازاں انہیں معلوم ہوا کہ وہ شخص ان سے اداکارہ ہونے کے ناطے شادی نہیں کر سکتا۔
خوبرو اداکارہ قدسیہ علی نے حال ہی میں دنیا نیوز کے مقبول ترین مزاحیہ پروگرام ’مذاق رات‘ میں بطور مہمان شرکت کی جہاں انہوں نے محبت سمیت مختلف معاملات پر کھل کر گفتگو کی۔
ایک سوال کے جواب میں قدسیہ علی نے بتایا کہ خود مختار اور آزاد خواتین کو قیمت چکانا پڑتی ہے حالانکہ اب 2025 گزرنے والا ہے لیکن حالات میں ابھی تک کوئی تبدیلی نہیں آئی، خود مختار اور آزاد عورتیں معاشرے میں بہت تنقید کی شکار ہوتی ہیں اور خاص طور پر اداکاراؤں کو لوگ اب بھی ایک خاص نظریے سے دیکھتے ہیں۔
قدسیہ علی کے مطابق خود مختار اور آزاد خاتون کے حوالے سے سوچا جاتا ہے کہ وہ کسی کے قابو میں نہیں آئے گی، وہ کسی کے آگے نہیں جھکے گی، اس لیے ان سے فاصلہ اختیار کیا جاتا ہے۔
اداکارہ نے کہا ہے کہ کسی کے آگے نہ جھکنے سے مراد حالات اور واقعات پر سمجھوتا نہ کرنا ہے اور خیال کیا جاتا ہے کہ خود مختار عورتیں کسی بات پر سمجھوتا نہیں کرتیں۔
ایک سوال کے جواب میں انہوں نے بتایا کہ ان کے ساتھ حال ہی میں ایک حادثہ ہوا، ان کے ایک شخص کے ساتھ تعلقات تھے لیکن پھر وہ تعلقات نہ رہے، بعد میں انہیں پتا چلا کہ مذکورہ شخص سے ان کی شادی نہیں ہو سکتی کیوں کہ وہ اداکارہ ہیں۔
قدسیہ علی کے مطابق انہیں شادی کرنے کے لیے اداکاری چھوڑنی پڑتی اس لیے انہوں نے تعلقات ختم کیا اور یہ کہ اب بھی ایسا سمجھا جاتا ہے اور مرد اداکارہ سے شادی کرنے سے کتراتے ہیں۔
ان کا کہنا تھا کہ معاشرے میں اب بھی خصوصی طور پر اداکاراؤں کو برا سمجھا جاتا ہے، ان کے سامنے تو لوگ ان کی تعریفیں کرتے ہیں لیکن بعد میں تنقید کا نشانہ بنایا جاتا ہے۔
اداکارنے مزید بتایا کہ لوگوں کی اداکارؤں سے متعلق سوچ اتنی منفی ہوتی ہے کہ بعض اداکارائیں تو یہ سوچنے پر مجبور ہوجاتی ہیں کہ شاید وہ غلط کام کر رہی ہیں۔
