ممبی: (ویب ڈیسک) بالی ووڈ کے سپر سٹار سلمان خان نے لیجنڈری اداکار دھرمیندر کے انتقال پر پہلی بار کھل کر بات کرتے ہوئے کہا میں نے اپنے والد جیسی شخصیت کھو دی۔
سلمان خان نے ایک بین الاقوامی پلیٹ فارم پر گفتگو کرتے ہوئے کہا کہ میں نے ایک والد جیسی شخصیت کھو دی ہے، مجھے لگتا ہے کہ وہ میرے لیے ایک تحریک تھے، میں نے ہمیشہ انہیں فالو کیا اور اپنے کیریئر میں جو کچھ بھی کیا، ایک ہیرو کو دیکھ کر کیا اور وہ ہیرو دھرما جی تھے۔
سلمان خان نے مزید کہا کہ اداکاری کے سفر میں انہیں دو شخصیات نے سب سے زیادہ متاثر کیا سکرپٹ کے لیول پر میں نے اپنے والد کو فالو کرنے کی کوشش کی، میری زندگی میں صرف دو شخصیات مجھے واقعی متاثر کرتی ہیں، میرے والد اور دھرما جی۔
سلمان خان سے پوچھا گیا کہ دھرمیندر میں ایسی کیا بات تھی جو انہیں دوسروں سے ممتاز بناتی تھی، تو انہوں نے جواب دیا کہ وہ ایک بہت شریف انسان تھے، بہت اچھے، بہت جذباتی۔
واضح رہے کہ سلمان خان اور دھرمیندر کے درمیان برسوں پر محیط قریبی تعلق رہا۔ دھرمیندر اکثر سلمان خان کو سنی اور بوبی دیول کے بعد اپنا تیسرا بیٹا کہا کرتے تھے، جو ان کے باہمی احترام اور محبت کی عکاسی کرتا ہے۔
