اسلام آباد: (ویب ڈیسک) وفاقی وزیر پارلیمانی امور ڈاکٹر طارق فضل چودھری نے کینسر کی روک تھام میں پاکستان بیت المال کا کردار قابل تحسین قرار دے دیا۔
طارق فضل چودھری نے پاکستان بیت المال کے زیراہتمام سیمینار سے خطاب کرتے ہوئے کہا کہ تعلیم، صحت دیگر بنیادی ضروریات فراہم کرنا ریاست کا فرض ہے، ہماری حکومت اس کے لئے ہر ممکن اقدام کررہی ہے۔
انہوں نے کہا کہ کینسر جیسے موذی مرض کی روک تھام کے حوالے سے سیمینار منعقد کرنے پر پاکستان بیت المال کو خراج تحسین پیش کرتا ہوں، کینسر اور دیگر مہلک بیماریوں کے پھیلاؤ کو روکنا اور اس کے شکار مریضوں کو علاج مہیا کرنا ہماری ذمہ داری ہے۔
وفاقی وزیر نے مزیدکہا کہ جب کوئی شخص مہلک بیماری کی وجہ سے زندگی اور موت کی کشمکش میں ہو اور علاج کے لئے پیسے بھی نہ ہوں تو یہ انتہائی تکلیف دہ لمحات ہوتے ہیں۔
ڈاکٹر طارق فضل چودھری کا مزیدکہنا تھا کہ ہمارے قائد میاں محمد نواز شریف نے بیت المال کا ادارہ اسی ویژن کے ساتھ بنایا تھا کہ متوسط طبقے کو علاج معالجے اور دیگر سہولیات فراہم کی جاسکیں، وزیر اعظم شہباز شریف، قائد نواز شریف کی سوچ کے مطابق پاکستان کو فلاحی ریاست بنانے کے لئے دن رات کام کررہے ہیں۔
انہوں نے کہا کہ خوشی ہے کہ بیت المال ملک کے دور دراز علاقوں میں وسائل کے مطابق بہترین خدمات سرانجام دے رہا ہے، مجھے پورا یقین ہے کہ حکومت بیت المال کو مزید مضبوط ادارہ بنائے گی اور اس کے ذریعے مزدوروں، طالبعلموں اور دیگر شعبہ زندگی کو فائدہ پہنچے گا۔
