اسلام آباد: (دنیا نویز) خیبر پختونخوا میں 2 نئے پولیو کیسز کی تصدیق ہوگئی جس کے باعث رواں سال ملک میں مجموعی کیسز کی تعداد 26 ہوگئی۔
نیشنل ایمرجنسی آپریشن سینٹر( این ای او سی) کے مطابق جنوبی خیبر پختونخوا کے اضلاع لکی مروت اور شمالی وزیرستان میں 2 نئے پولیو کیسز کی تصدیق ہوئی ہے، رواں سال پاکستان میں پولیو کے مجموعی کیسز کی تعداد 26 ہو گئی۔
این ای او سی کے مطابق وائرس کی روک تھام کے لیے جنوبی خیبر پختونخوا میں اعلیٰ معیار کی پولیو مہم جاری ہے، پولیو مہمات بچوں کو اس لاعلاج بیماری سے محفوظ رکھنے میں مددگار ثابت ہوتی ہیں۔
ترجمان این ای او سی نے بتایا کہ جنوبی خیبرپختونخوا، باجوڑ اور اپر دیر میں آج سے پولیو مہم کا آغازکر دیا گیا ہے۔ رواں ہفتے کی مہم میں 16 لاکھ 85 ہزار سے زائد بچوں کو پولیو سے بچاؤ کے قطرے پلائے جائیں گے۔
این ای او سی نے کہا کہ والدین سے اپیل ہے کہ ہر مہم میں اپنے 5 سال سے کم عمر بچوں کو پولیو کے قطرے لازمی پلائیں۔
