اسلام آباد: (دنیا نیوز) جاپان کی جانب سے پاکستان انسدادِ پولیو پروگرام کیلئے 3.5 ملین ڈالر گرانٹ کا اعلان کیا گیا۔
نیشنل ای او سی کے مطابق اِس گرانٹ کے ذریعے 24 لاکھ سے زائد پولیو ویکسین کی خوراکیں خریدی جائیں گی۔
اِس حوالے سے وفاقی دارالحکومت میں تقریب کا اہتمام کیا گیا جس میں جاپان اور یونیسیف کے درمیان معاہدے پر دستخط ہوئے، گرانٹ سے پولیو وائرس کے پھیلاؤ کو روکنے اور گزشتہ کامیابیوں کو برقرار رکھنے میں مدد ملے گی۔
نیشنل ای او سی نے بتایا کہ پاکستان دُنیا کے اُن دو ممالک میں سے ایک ہے جہاں پولیو وائرس اب بھی موجود ہے، اس سال اب تک پولیو کے 30 کیسز رپورٹ ہو چکے ہیں، پولیو کے خاتمے کے لیے مشترکہ اور مربوط حکمتِ عملی پر تیزی سے عمل جاری ہے۔
دوسری جانب وزیراعظم کی فوکل پرسن برائے انسدادِ پولیو عائشہ رضا فاروق کا کہنا تھا کہ پولیو کے خاتمے کے لیے جاپان کے مسلسل تعاون پر شکر گزار ہیں، یہ شراکت داری مالی امداد سے بڑھ کر یکجہتی اور مشترکہ مقصد کی علامت ہے۔
عائشہ رضا فاروق نے کہا کہ پولیو ویکسین کی ہر خوراک پاکستان کو پولیو سے پاک منزل کے مزید قریب لے آتی ہے، پاکستان میں تعینات جاپان کے سفیر نے پاکستان کی صحت عامہ کی ترجیحات کے لیے اپنے طویل المدتی عزم کا اعادہ کیا۔
نیشنل ای او سی کا مزید کہنا تھا کہ جاپان کی حکومت 1996 سے پاکستان میں پولیو کے خاتمے کی دیرینہ شراکت دار ہے،جاپان نے پولیو کے خلاف جنگ میں 245 ملین ڈالر سے زائد گرانٹس اور قرضے فراہم کیے، جاپان کی 245 ملین ڈالر کی معاونت پولیو فری پاکستان کے ہدف میں اہم کردار ادا کر رہی ہے۔
علاوہ ازیں یونیسف کے نمائندہ برائے پاکستان، پرنیلا آئیرنسائیڈ نے کہا کہ جاپان کی شراکت ہر بچے تک ویکسین پہنچانے میں مددگار ثابت ہوگی، یونیسف، حکومت اور کمیونٹیز جاپان کی معاونت کو قدر کی نگاہ سے دیکھتی ہیں۔
