لاہور: (دنیا نیوز) وزیراعلیٰ پنجاب مریم نواز شریف نے کہا ہے کہ پنجاب کے ہر شہری کو بہترین علاج اس کی دہلیز پر فراہم کرنے کا وعدہ ہر صورت نبھائیں گے۔
وزیراعلیٰ پنجاب نے صحت کی سہولیات کو ایک انقلابی ویژن پیش کرتے ہوئے پنجاب کے ہر ضلع میں سٹیٹ آف دی آرٹ کارڈیک کیتھ لیب قائم کرنے کا اعلان کیا جبکہ ان کی ہدایت پر جھنگ، میانوالی اور اوکاڑہ میں کارڈیک کیتھ لیبز کو جلد فنکشنل کر دیا جائے گا جبکہ فیز ٹو کے تحت بھکر، چکوال، حافظ آباد، خانیوال، منڈی بہاؤالدین، راجن پور اور ٹوبہ ٹیک سنگھ میں کیتھ لیبز قائم کی جائیں گی۔
ضلعی سطح پر قائم کی جانے والی ان کارڈیک کیتھ لیبز میں انجیوگرافی، انجیو پلاسٹی اور پرائمری پی سی آئی کی سہولت دستیاب ہوگی۔
وزیراعلیٰ کے مطابق کیتھ لیب کے قیام سے 60 سے 90 منٹ کے اندر ہسپتال پہنچنے والے دل کے مریض کی جان بچانا ممکن ہو سکے گا، ہارٹ اٹیک کی ایمرجنسی میں اگر مریض 90 منٹ کے اندر ضلعی کارڈیالوجی مرکز پہنچ جائے تو اس کی جان بچائی جا سکتی ہے جس سے مریضوں کو علاج کیلئے دور دراز بڑے شہروں کا رخ نہیں کرنا پڑے گا۔
مریم نواز نے ضلعی ہسپتالوں میں سپیشلسٹ اور کارڈیک ڈاکٹروں کی تعیناتی یقینی بنانے کی بھی ہدایت کی ہے، اس کے ساتھ ساتھ ضلعی کارڈیک کیتھ لیبز میں فرائض انجام دینے والے ڈاکٹروں کیلئے خصوصی پے پیکیج دینے کا فیصلہ بھی کیا گیا ہے۔
وزیراعلیٰ مریم نواز شریف کا کہنا تھا کہ جدید ترین کیتھ لیبز میں عالمی ایس او پیز کے مطابق علاج کی سہولت فراہم کی جائے گی جس سے امراض قلب کی پیچیدگیوں سے بچاؤ ممکن ہوگا، ان منصوبوں سے صوبے کے ہیلتھ کیئر سسٹم میں بہتری آئے گی اور بڑے ہسپتالوں میں مریضوں کا دباؤ بھی کم ہوگا۔
مزید برآں انہوں نے کہا کہ کون سوچ سکتا تھا کہ ڈی ایچ کیو ہسپتالوں میں کیتھ لیبز قائم ہوں گی اور دل کے مریضوں کا جدید علاج ممکن ہوگا، پنجاب کے ہر شہری کو معیاری اور بہترین علاج اس کی دہلیز پر فراہم کرنے کا وعدہ ہر صورت نبھائیں گے۔
