مچھ واقعہ میں ملوث افراد کو کیفر کردار تک پہنچائیں گے، آرمی چیف

راولپنڈی: (دنیا نیوز) آرمی چیف جنرل قمر جاوید باجوہ نے کہا ہے کہ شہدا کا خون رائیگاں نہیں جانے دیں‌گے، مچھ واقعہ میں ملوث افراد کو کیفر دار تک پہنچایا جائے گا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے یہ بات دورہ کوئٹہ کے موقع پر ہزارہ برادری کے افراد سے ملاقات کے موقع پر کہی۔ آرمی چیف نے مچھ واقعہ کے متاثرہ خاندانوں اور ہزارہ برادری کے افراد سے خصوصی ملاقات کی اور کچھ وقت بھی ان کیساتھ گزارا۔

آئی ایس پی آر کے مطابق آرمی چیف جنرل قمر جاوید باجوہ نے آج کوئٹہ کا دورہ کیا۔ اس موقع پر انھیں سدرن کمانڈ ہیڈ کوارٹرز میں سیکیورٹی کی صورتحال پر بریفنگ دی گئی۔

آرمی چیف کو بلوچستان میں سیکیورٹی چیلنجز بارے بتایا گیا جبکہ صورتحال کنٹرول میں رکھنے، پاک افغان اور ایران سرحدوں پر سرحدی انتظامات سے بھی آگاہ کیا گیا۔

آرمی چیف نے صوبے میں مشکل صورتحال کے باوجود امن واستحکام یقینی بنانے کی تعریف کی اور جوانوں کی تیاری کو بھی سراہا۔ اس موقع پر گیرژن افسران سے خطاب میں پاک فوج کے سپہ سالار جنرل قمر جاوید باجوہ کا کہنا تھا کہ بلوچستان اپنی جغرافیائی حیثیت کے باعث دشمنوں کو کھٹک رہا ہے۔ بلوچستان پاکستان کا مستقبل، صوبے کی ترقی اور خوشحالی پاکستان کی ترقی ہے۔

آرمی چیف کا کہنا تھا کہ دشمن قوتوں کی تخریب کاری کی کوششوں کو کامیاب نہیں ہونے دیا جائے گا۔ بلوچستان کی سلامتی، استحکام اور خوشحالی کو ہر صورت برقرار رکھا جائے گا۔

#COAS visited Quetta today on a day long visit. Given detailed security brief at HQ Southern Command, met families of victims of #Mach incident & also interacted with a large gathering of #Hazara community. At HQ Southern Command, COAS was apprised about prevailing security (1/5) pic.twitter.com/Bu5tsqNNZW

— DG ISPR (@OfficialDGISPR) January 13, 2021