اسلام آباد: (دنیا نیوز) وزیراعظم نے سندھ میں جرائم اور امن کی بگڑتی صورتحال کے پیش نظر وفاقی وزیر داخلہ شیخ رشید کو فوری طور پر کراچی جانے کی ہدایت جاری کی ہے، وہ قانون نافذ کرنے والے اداروں سے مل کر حکمت عملی طے کریں گے۔
اس بات کی تصدیق وفاقی وزیر برائے اطلاعات ونشریات فواد چودھری نے سماجی رابطوں کی ویب سائٹ ٹویٹر کے ذریعے جاری ایک بیان میں کی۔ ان کا کہنا تھا کہ وزیراعظم عمران خان نے گورنر سندھ عمران اسماعیل اور وزیر پلاننگ اسد عمر سے سندھ کی صورتحال پر تفصیلی گفتگو کی۔
فواد چودھری نے اپنی ٹویٹ میں لکھا کہ دونوں اکابرین نے وزیراعظم کو سندھ کی انتظامی بد انتظامی اور خصوصاً امن وامان اور بڑھتے ہوئے جرائم پر اپنی شدید تشویش سے آگاہ کیا۔
ان معلومات پر نوٹس لیتے ہوئے وزیر اعظم نے وزیر داخلہ شیخ رشید آحمد کو ھدائیت کی ہے کہ وہ سندہ کا دورہ کریں اور قانون نافذ کرنیوالے اداروں سے مل کراس صورتحال پر حکمت عملی طے کریں، وزیر داخلہ اس دورے کے بعد اپنی رپورٹ وزیر اعظم کے سامنے رکھیں گے
— Ch Fawad Hussain (@fawadchaudhry) May 25, 2021
وفاقی وزیر کا کہنا تھا کہ ان معلومات پر نوٹس لیتے ہوئے وزیراعظم نے وزیر داخلہ شیخ رشید احمد کو ہدایت کی ہے کہ وہ سندھ کا دورہ کریں اور قانون نافذ کرنیوالے اداروں سے مل کراس صورتحال پر حکمت عملی طے کریں۔
انہوں نے بتایا کہ وزیر داخلہ شیخ رشید احمد اس دورے کے بعد اپنی رپورٹ وزیراعظم عمران خان کے سامنے رکھیں گے۔
