اسلام آباد: (دنیا نیوز) جوڈیشل کمپلیکس ہنگامہ آرائی کیس میں انسداد دہشتگردی عدالت اسلام آباد نے رہنما پی ٹی آئی اور سینیٹر اعظم سواتی کی ضمانت قبل از گرفتاری منظور کر لی۔
پی ٹی آئی رہنما اعظم سواتی کی جانب سے ضمانت قبل از گرفتاری کی درخواست دائر کی گئی جس پر اعظم سواتی اپنے وکیل بابر اعوان کے ہمراہ عدالت میں پیش ہوئے۔
بابر اعوان نے کہا کہ اعظم سواتی کو ایف آئی آر میں سیاسی بنیادوں پر نامزد کیا گیا اور مقدمے سوچے سمجھے منصوبے کے تحت درج کئے گئے، دہشت گردی کی دفعہ لگانے کا کوئی جواز نہیں بنتا، انہوں نے استدعا کی کہ اعظم سواتی جائے وقوعہ پر موجود بھی نہیں تھے اس لئے ضمانت منظور کی جائے۔
عدالت نے اعظم سواتی کی 50 ہزار روپے کے ضمانتی مچلکوں کے عوض 5 اپریل تک ضمانت منظور کرتے ہوئے کیس کی سماعت ملتوی کر دی۔
دوسری جانب، پی ٹی آئی رہنما امجد خان نیازی سمیت 63 گرفتار کارکنان کی ضمانت بھی منظور کر لی گئی۔
اے ٹی سی کے جج راجہ جواد عباس نے ضمانتیں منظور کیں، عدالت نے گرفتار کارکنان کو 50 ہزار روپے مچلکوں کے عوض رہا کرنے کا حکم دیا۔
