لاہور: (دنیا نیوز) الیکشن کی گہما گہمی عروج پر پہنچ گئی، لاہور کے حلقوں میں امیدواروں کی تشہیری مہم شروع ہو گئی۔
سڑکوں، گلیوں، بازاروں اور چوراہوں پر بینرز اور فلیکسز آویزاں کر دیئے گئے، حلقہ این اے 117 لاہور ون سے 38 امیدواروں کے کاغذات نامزدگی منظور، معروف سیاسی شخصیات بھی اس حلقے میں امیدواروں کی فہرست میں شامل ہیں۔
این اے 117 میں مسلم لیگ ن کے امیدوار میاں عظیم یاسین، پیپلزپارٹی کے آصف ہاشمی، پی ٹی آئی کے علی اعجاز گجر اور تحریک لبیک کے ملک سیف الرحمان کے بینرز اور فلیکسز موجود ہیں۔
اسی طرح پی پی 145 سے مسلم لیگ ن کے سمیع اللہ خان، پیپلزپارٹی کے رانا افتخار علی، جماعت اسلامی کے مظہر ملک اور ٹی ایل پی کے میاں منیب طارق بھی انتخابی مہم چلا رہے ہیں جبکہ پی پی 146 سے پاکستان تحریک انصاف کے مبشر علی گجر اور مسلم لیگ ن کے احسان خان آمنے سامنے ہیں۔
حلقہ این اے117 سے ووٹرز کا کہنا ہے کہ مہنگائی سب سے بڑا مسئلہ ہے جس کا حل ضروری ہے۔
این اے 117 سے 38 امیدواروں کے کاغذات نامزدگی منظور ہوئے جن میں سردار ایاز صادق، عطاء اللہ تارڑ، میاں عظیم یاسین، غزالی سلیم، عبدالعلیم خان، ابرارالحق، آصف ہاشمی اور دیگر شامل ہیں۔
