پشاور: (دنیا نیوز) سینیٹ انتخابات کیلئے پی ٹی آئی رہنماؤں کے کاغذات مسترد ہونے پر بیرسڑ ڈاکٹر سیف کا ردعمل سامنے آگیا۔
بیرسٹر ڈاکٹر سیف نے کہا کہ پی ٹی آئی کے سینیٹ کے امیدواروں کے کاغذات نامزدگی مسترد کرنا افسوسناک ہے، عام انتخابات میں تحریک انصاف کے مینڈیٹ کو تسلیم نہ کرنے کا سلسلہ ابھی تک جاری ہے، بے بنیاد وجوہات کی بنیاد پر ہمارے سینیٹ کے امیدواروں کے کاغذات مسترد کئے گئے۔
انہوں نے کہا کہ زلفی بخاری، مراد سعید، اعظم سواتی کو اس ڈر سے باہر کیا جا رہا ہے کہ وہ سینیٹ میں عوام کی نمائندگی حقیقی انداز میں کریں گے، ارباب اختیار، ارباب اقتدار اور فیصلہ سازوں سے درخواست کرتا ہوں کہ وہ عوام کو انکی نمائندگی کے حق سے محروم نہ کریں۔
بیرسٹر ڈاکٹر سیف نے کہاکہ سینیٹ الیکشن میں حصہ لینا ہمارا آئینی، قانونی اور جمہوری حق ہے، پی ٹی آئی رہنماؤں کو سینیٹ الیکشن سے دور رکھنے سے جمہوری نظام پر منفی اثرات مرتب ہوں گے، پی ٹی آئی کیساتھ ظلم و زیادتی کا سلسلہ بند کیا جائے۔
انہوں نے مزید کہا کہ بانی پی ٹی آئی اور ہمارے گرفتار کارکنوں کو فی الفور رہا کیا جائے، غیر ضروری طور پر قانون کا غیر قانونی استعمال بند کیا جائے۔
