لاہور: (دنیا نیوز) لاہور ہائیکورٹ نے ضمنی الیکشن میں دفعہ 144 کے نفاذ کیخلاف درخواست پر فیصلہ محفوظ کر لیا۔
لاہور ہائیکورٹ کے جسٹس شاہد بلال حسن نے ضمنی الیکشن میں دفعہ 144 کے نفاذ کیخلاف شہری ملک نجی اللہ کی درخواست پر سماعت کی۔
درخواست گزار نے موقف اپنایا کہ الیکشن کی شفافیت میں ہوم ڈیپارٹمنٹ کا کوئی کردار نہیں، دفعہ 144 کا نفاذ الیکشن کی شفافیت پر سوالیہ نشان ہے، عام انتخابات میں بھی دفعہ 144 نافذ کیا گیا جس کیخلاف درخواست دائر کی، سنگل بنچ نے وہ درخواست مسترد کر دی تھی۔
درخواست گزار کا کہنا تھا کہ سنگل بنچ کے فیصلے کے خلاف انٹرا کورٹ اپیل دائر کی، الیکشن ہونے کی وجہ سے دو رکنی بنچ نے عام انتخابات میں دفعہ 144 کے خلاف حکم نہیں دیا، ضمنی انتخابات میں دوبارہ دفعہ 144 نافذ کر دی گئی جو بنیادی حقوق کے خلاف ہے۔
دائر درخواست میں استدعا کی گئی کہ عدالت دفعہ 144 کے نفاذ کو کالعدم قرار دے۔
لاہور ہائیکورٹ نے ضمنی الیکشن میں دفعہ 144 کے نفاذ کے خلاف درخواست پر فیصلہ محفوظ کر لیا۔
