وادی تیراہ: (دنیا نیوز) خیبرپختونخوا کے عوام فتنتہ الخوارج کیخلاف متحد ہوگئے، چھٹی پر آئے پاک فوج کے جوان کے اغوا کی کوشش ناکام بنا دی۔
سکیورٹی ذرائع کے مطابق ضلع خیبر کی وادی تیراہ علاقہ برقمبرخیل ولی خیل میں چھٹی پر آئے پاک فوج کے جوان کےگھر کا محاصرہ کرنے والے مسلح افراد کے خلاف مقامی افراد متحد ہوگئے۔
دہشتگرد پاک فوج کے نواج کو زبردستی اٹھا کر ساتھ لے جانے کی کوشش کررہے تھے، دہشتگردوں نے گھر میں موجود خواتین پر فائرنگ بھی کی تاہم کوئی جانی نقصان نہیں ہوا، مقامی افراد نے فتنہ الخوارج کے ہاتھوں جوان نورسلیم ولد خلوت کو اغوا کرنے کی کوشش ناکام بنا دی۔
سکیورٹی ذرائع کے مطابق لکی مروت میں نماز عشاء کے وقت عباسہ خٹک میں قائم مسجد کے باہر سکیورٹی پر مامور مقامی رہائشی کا خوارج سے سامنا ہوا، مسجد میں موجود تمام نمازیوں نے ملکر خوارج کو مار بھگایا۔
مقامی افراد اور خوارج کے درمیان فائرنگ کا تبادلہ بھی ہوا جس پر ڈی پی او لکی مروت کی طرف سے چوکی عباسہ کو آرڈر دیا گیا کہ مقامی لوگوں کو ہر طرح کی سپورٹ مہیا کی جائے۔
ذرائع کے مطابق پاک آرمی جوان نور سلیم کی ڈیوٹی 7بلوچ یونٹ میں ہے اور اس وقت بلوچستان کے ضلع آوران میں فرائضی منصبی سرانجام دے رہا ہے۔
