اسلام آباد:(دنیا نیوز) وزیراعظم شہبازشریف نے پٹرولیم مصنوعات میں کمی سے متعلق بڑا فیصلہ کرلیا، ثمرات عوام کو منتقل کرنے کے بجائے اہم سڑکوں پر لگانے کا اعلان کیا۔
کابینہ اجلاس میں گفتگو کرتے ہوئے شہباز شریف کا کہنا تھا کہ قلات، خضدار اور چمن کی سڑک خونی کہلاتی ہے، اسے بنائیں گے، حیدرآباد موٹر وے کے بعد کراچی اور قلات سڑک بنائیں گے۔
انہوں نے کہا کہ عالمی منڈی میں تیل کی قیمتیں مزید کم ہوئی ہیں، پٹرولیم کی قیمتوں میں کمی کے ثمرات عوام کو منتقلی کے بجائے اہم سڑکوں پر لگائے جائیں گے، ان پیسوں سے قوم کے زخموں کی مرہم پٹی کریں گے، رقم ہم بلوچستان کے عوام کی نذر کر رہے ہیں۔
وزیر اعظم کا کہنا تھا کہ وفاق شفاف طریقے سےایم 6 اورایم 9 بنائے گا، بلوچستان میں دو رویہ ہائی وے کا سنگ بنیاد رکھا تھا، چاروں صوبے چار بھائیوں جیسے ہیں، بلوچستان پاکستان کا سب سے بڑاصوبہ ہے، وہاں فاصلے بہت زیادہ ہیں، بجٹ بھی زیادہ لگے گا، بلوچستان میں ہزاروں ٹیوب ویل شمسی توانائی سے چلیں گےاور خونی سڑک کو خوشحالی کی سڑک بنائیں گے۔
شہباز شریف نے کہا کہ سڑک کی تعمیر کا تخمینہ 300 ارب روپے ہے، میں اورسرفرازبگٹی خود کھڑے ہو کر سڑکیں بنوائیں گے، کچی کینال کامنصوبہ بھی مکمل کریں گے، بجلی کی قیمتوں میں ساڑھے 7 روپے کمی کی گئی ہے، قیمتوں میں کمی کا اطلاق تمام صارفین پر ہوگا، ساڑھے7 روپے کمی کرنا بہت بڑا چیلنج تھا، سب کی کاوشوں سے قوم کوعید کا تحفہ دیا۔
ان کا مزید کہنا تھا سیستان میں 8 پاکستانیوں کو شہید کیا گیا، سیستان واقعہ کی جتنی مذمت کریں کم ہے، ایرانی وزیرخارجہ سے معاملے پر بات ہوئی ہے، امید ہے ایرانی حکومت ذمہ داروں کو فی الفور گرفتار کرے گی۔
واضح رہے پٹرول کا موجودہ ریٹ 254 روپے 63 پیسے فی لٹر جبکہ ہائی سپیڈ ڈیزل کی قیمت 258 روپے 64 پیسے لٹر ہے۔
