لاہور: (دنیا نیوز) وزیر اطلاعات پنجاب عظمیٰ بخاری سے محرم جلوسوں کے لائسنس ہولڈرز اور امن کمیٹی کے ارکان نے ملاقات کی۔
ملاقات میں مجالس اور جلوس کے لائسنس ہولڈرز نے محرم میں عزاداران امام حسین کیلئے مثالی انتظامات پر اظہار تشکر کیا، شیعہ علماء کرام نے بہترین انتظامات اور سہولیات فراہم کرنے پر مریم نواز کا شکریہ ادا کیا۔
ملاقات میں سیکرٹری انفارمیشن پنجاب طاہر رضا ہمدانی بھی موجود تھے۔
صوبائی وزیر پنجاب سے شیعہ علماء کونسل پنجاب کے وفد نے بھی ملاقات کی، وفد کی جانب سے وزیراعلیٰ پنجاب مریم نواز کیلئے عظمیٰ بخاری کو ’’ایوارڈ امام حسین‘‘ پیش کیا گیا۔
عظمیٰ بخاری نے گفتگو کرتے ہوئے کہا کہ محرم الحرام کے انتظامات پر مجالس اور جلوسوں کے منتظمین کا مطمئن ہونا خوش آئند ہے، وزیراعلیٰ پنجاب نے محرم کے تمام انتظامات کی لمحہ بہ لمحہ مانیٹرنگ خود کی، اہل تشیع کمیونٹی کا پنجاب حکومت سے تشکر کا اظہار اچھی روایت ہے۔
وزیر اطلاعات کا مزید کہنا تھا کہ شہریوں کو ہر عید اور تہوار پر پنجاب میں منفرد اور نمایاں انتظامات ہوتے نظر آ رہے ہیں، مریم نواز پنجاب کے لوگوں کی خدمت میں کوئی کمی یا کوتاہی برداشت نہیں کرتی ہیں، اس لئے ان کی پوری ٹیم اور پنجاب کی انتظامیہ ہمہ وقت میدان عمل میں رہتے ہیں۔
وفد میں علامہ کاظم رضا نقوی، شبیہ شیرازی، فوکل پرسن قاسم علی، یوسف جوہری، حافظ اقبال، الیاس یزدانی، صغیر ورک، کامران نقوی، اصغر حسین، ملک ناصر، ملک شاہد، واجد علی، عمار نقوی اور صفدر جعفری شامل تھے۔
