اسلام آباد: (دنیا نیوز) فیض آباد احتجاج کیس میں پی ٹی آئی رہنما فیصل جاوید خان کی بریت کی درخواست مسترد کر دی گئی۔
انسدادِ دہشت گردی عدالت اسلام آباد میں پی ٹی آئی رہنماؤں کے خلاف بانی پی ٹی آئی کی نااہلی کے بعد فیض آباد کے مقام پر احتجاج کرنے سے متعلق کیس کی سماعت ہوئی، کیس کی سماعت انسداد دہشت گردی عدالت کے جج طاہر عباس سپرا نے کی۔
سماعت کے دوران عامر محمود کیانی، راشد حفیظ، جمشید مغل اور دیگر ملزمان عدالت میں پیش ہوئے جبکہ فیصل جاوید خان، حیدر بن مسعود اور راجہ ماجد کی جانب سے حاضری سے استثنیٰ کی درخواستیں جمع کرائی گئیں۔
ملزمان کی جانب سے الیاس صدیقی، سردار مصروف خان ایڈوکیٹ، زاہد بشیر ڈار اور دیگر وکلا عدالت میں پیش ہوئے۔
سماعت کے دوران پی ٹی آئی رہنما فیصل جاوید خان کی جانب سے دائر بریّت کی درخواست کو عدالت نے خارج کر دیا جبکہ استغاثہ کی جانب سے دو گواہان عدالت میں پیش کیے گئے جن کے بیانات ریکارڈ کر لیے گئے، عدالت نے ہدایت کی کہ اگر دفاع چاہیے تو اگلی پیشی پر گواہان پر جرح کی جا سکتی ہے۔
وزیراعلیٰ خیبرپختونخوا علی امین گنڈا پور آج بھی عدالت میں پیش نہ ہوئے، جج طاہر عباس سپرا نے ریمارکس دیئے کہ گزشتہ آرڈر ہی دوبارہ جاری کر دیتے ہیں۔
سماعت کے دوران جب عامر محمود کیانی عدالت میں پیش ہوئے تو جج طاہر عباس سپرا نے انہیں مخاطب کرتے ہوئے کہا عامر کیانی صاحب! آپ عدالت سے چلے جائیں، آپ اشتہاری ہیں، اگر پولیس نے سن لیا تو گرفتار کر لیا جائے گا۔
معزز جج نے مزید کہا کہ عامر کیانی تین مرتبہ اشتہاری قرار دیئے جا چکے ہیں جس پر عامر کیانی نے کہا کہ سر میری غلطی ہے، عدالت میں پیش نہ ہو سکا، تسلیم کرتا ہوں، جج نے ہدایت کی کہ وہ درخواست لے کر آئیں، پھر عدالت غور کرے گی۔
بعدازاں انسدادِ دہشت گردی عدالت اسلام آباد نے پی ٹی آئی رہنماؤں کے خلاف بانی پی ٹی آئی کی نااہلی کے بعد فیض آباد کے مقام پر احتجاج کرنے سے متعلق کیس کی مزید سماعت 31 جولائی تک ملتوی کر دی۔
