اسلام آباد :(دنیا نیوز) چیئرمین پاکستان تحریک انصاف بیرسٹر گوہر عدلیہ کے آج متنازعہ فیصلوں سے نئے باب کا اضافہ ہوا۔
وفاقی دارالحکومت میں دیگر سینئر رہنماؤں کے ساتھ پریس کانفرنس کرتے ہوئے بیرسٹر گوہر کا کہنا تھا کہ آج ہماری پٹیشن پر کوئی فیصلہ نہیں ، آج عدالتوں سے دو فیصلے آئے، عمران خان نے فیئر ٹرائل کا مطالبہ کیا ہے۔
انہوں نے کہا کہ قانون کے تقاضوں کو پورا کیے بغیر سزائیں سنائی گئیں، جو ہمارے رہنماؤں کے ساتھ سراسر ظلم ہے، عدلیہ نے متنازعہ فیصلوں میں نئے باب کا اضافہ ہوا، لوگوں کا عدلیہ سے اعتماد اٹھ گیا ہے۔
چیئرمین پاکستان تحریک انصاف کا مزید کہنا تھا کہ تحریک انصاف نے ہمیشہ 9 مئی کے واقعات کی مذمت کی ، آج کے فیصلوں سے ثابت ہو گیا کہ عدلیہ اپنی ذمہ داریاں ادا کرنے میں ناکام ہو گئی۔
سلمان اکرم راجہ
سیکرٹری جنرل پاکستان تحریک انصاف سلمان اکرم راجہ نے کہا کہ آج کی سزائیں ایسی ہیں جیسے جمہوریت کو سزا دی گئی، ایک پولیس اہلکار کہتا ہے کہ میں زمان پارک میں داخل ہو گیا اور صوفے کے پیچھے چھپ گیا۔
ان کا کہنا تھا کہ یہ تیسرا مقدمہ ہے جس میں ہمارے رہنماؤں کو سزائیں دی گئیں ، تمام مقدمات میں وہی دو گواہ پیش کیے گئے،آج کے فیصلے سے ملک کی بدنامی ہوئی،اس وقت ملک میں عدالتی نظام منہدم ہو چکا ہے۔
سیکرٹری جنرل نے کہا کہ یہ سیاسی معاملہ نہیں رہا ہمارےبچوں کےمستقبل کا معاملہ ہے، آج جمہوریت پرحملہ اورمذاق ہوا ہے، فیصلہ کرنا ہوگا کیا اسی نظام کوبرداشت کرنا ہےیا تبدیل کرنا ہے۔
بابر اعوان
رہنما تحریک انصاف بابر اعوان کا کہنا تھا کہ یہ فیصلےپانچ اگست کی تحریک سےلنک ہے، جن لوگوں کوسزائیں دی گئی سارےضمیر کے قیدی ہے، پاکستان کےرول آف لا کا مرڈرکیا گیا ہے۔
انہوں نے مزید کہا کہ تمام سزاؤں کوہائی کورٹ میں چیلنج کریں گے، دہشت گرد روزانہ ہمارے بچوں کو مارتے ہیں، بتایا جائےدہشت گردوں کے ٹرائل کونسی عدالت میں ہو رہے ہیں؟ نو مئی مقدمات کی کہاں ہے سی سی ٹی وی فوٹیج؟
شیخ وقاص اکرم
سیکرٹری اطلاعات تحریک انصاف شیخ وقاص اکرم کا کہنا تھا کہ ہم واضح الفاظ میں ان سزاؤں کومسترد کرتے ہیں، ہائی کورٹ میں ان سزاؤں کوچیلنج کریں گے۔
انہوں نے کہا کہ جن سازش کا ذکرکیا گیا اس سازش کا ایف آئی آرمیں ذکرہی نہیں، ایف آئی آر واقعے سے7گھنٹے پہلے ہی درج کر لی گئی، تفتیشی نےعدالت میں تسلیم کیا جائےوقوعہ کا دورہ ہی نہیں کیا۔
