وفاقی آئینی عدالت کے پہلے چیف جسٹس امین الدین خان نے حلف اٹھا لیا

اسلام آباد: (دنیا نیوز) وفاقی آئینی عدالت کے پہلے چیف جسٹس امین الدین خان نے عہدے کا حلف اٹھا لیا۔

ایوان صدر اسلام آباد میں ہونے والی حلف برداری تقریب میں صدر مملکت آصف علی زرداری نے وفاقی آئینی عدالت کے پہلے چیف جسٹس امین الدین خان سے ان کے عہدے کا حلف لیا۔

وزیراعظم محمد شہباز شریف، فیلڈ مارشل سید عاصم منیر، پاک فضائیہ اور بحریہ کے سربراہان اور دیگر اعلیٰ حکام تقریب میں شریک ہوئے۔

سپریم کورٹ کے چیف جسٹس محمد یحییٰ آفریدی، چیئرمین سینیٹ سید یوسف رضا گیلانی، سپیکر قومی اسمبلی سردار ایاز صادق، چیئرمین پاکستان پیپلزپارٹی بلاول بھٹو زرداری سمیت وفاقی وزراء، ارکان پارلیمنٹ، ججز صاحبان اور دیگر نے شرکت کی۔

گزشتہ روز وزیراعظم کی ایڈوائس پر صدر مملکت آصف علی زرداری نے جسٹس امین الدین خان کی تقرری کی منظوری دی تھی ، وزارت قانون و انصاف نے ان کی تقرری کا نوٹیفکیشن بھی جاری کیا تھا۔

واضح رہے کہ اس سے قبل جسٹس امین الدین خان آئینی بنچ کے سربراہ تھے، انہوں نے 30 نومبر کو عہدہ سے ریٹائر ہونا تھا۔

وفاقی آئینی عدالت کے ججز کا صدارتی آرڈر جاری

صدرِ مملکت آصف علی زرداری نے وفاقی آئینی عدالت کے ججز کے صدارتی آرڈر جاری کر دیئے ہیں۔

ذرائع نے بتایا کہ وفاقی آئینی عدالت چیف جسٹس سمیت 13 ججز پر مشتمل ہوگی اور وفاقی آئینی عدالت اسلام آباد ہائی کورٹ کے ٹاپ فلور پر قائم کی جائے گی، ججز کی فہرست میں جسٹس علی باقر نجفی ، جسٹس حسن اظہر رضوی، جسٹس روزی خان ، جسٹس کے کے آغا اور جسٹس عامر فاروق شامل ہیں۔

ذرائع کا کہنا تھا کہ یہ تمام ججز آئینی عدالت کے باقاعدہ فیصلوں میں حصہ لیں گے اور عدالتی کارروائیوں کا آغاز آئندہ دنوں میں متوقع ہے۔