حکومت نے خطے کی بدلتی صورتحال کے باعث توانائی کی فراہمی پر مسلسل نظر رکھنے کا فیصلہ کیا تھا، حکومتی کمیٹی نے عالمی منڈی میں تیل کی قیمتوں، فریٹ اور انشورنس اخراجات کا تفصیلی جائزہ لیا۔

وزیر خزانہ محمد اورنگزیب نے تیل کی سپلائی چین سے متعلق اجلاس کی صدارت کی، حکومتی کمیٹی کل حتمی سفارشات اور جامع عملدرآمد پلان وزیراعظم کو پیش کرے گی۔

کمیٹی نے توانائی کی صورتحال پر روزانہ کی بنیاد پر اجلاس جاری رکھنے کا بھی فیصلہ کیا، ذخیرہ اندوزی، غیر قانونی ذخیرہ اور سمگلنگ روکنے کیلئے سخت کریک ڈاؤن کا فیصلہ کیا۔

اجلاس میں صوبائی حکومتوں، اوگرا اور دیگر اداروں کے درمیان مشترکہ کارروائی پر اتفاق کیا گیا۔

وزیر خزانہ نے کہا کہ متبادل سپلائی روٹس اور دوست ممالک سے اضافی تیل کی فراہمی کیلئے رابطے جاری ہیں، حکومت کی ترجیح ملک بھر میں پٹرولیم مصنوعات کی بلا تعطل فراہمی یقینی بنانا ہے۔

محمد اورنگزیب نے کہا کہ ممکنہ عالمی دباؤ کے باوجود مقامی مارکیٹ میں استحکام برقرار رکھنے کیلئے اقدامات جاری ہیں۔

اجلاس میں توانائی سپلائی کیلئے مختلف ہنگامی اور متبادل منصوبوں، ایل این جی اور ایل پی جی سپلائی چین کی صورتحال اور شیڈول کا جائزہ لیا گیا، ضرورت پڑنے پر ایندھن کے محتاط استعمال کیلئے اقدامات زیر غور آئے۔