عدالتی کارکردگی کے اعداد و شمار کے مطابق جسٹس غلام سرور نہنگ نے سنگل بینچ کی حیثیت سے 911 مقدمات کے فیصلے کیے، جبکہ جسٹس محمد طارق ندیم اور جسٹس غلام سرور نہنگ پر مشتمل ڈویژن بینچ نے 378 مقدمات نمٹائے۔

ڈویژن بینچ کی جانب سے نمٹائے گئے 378 مقدمات میں 132 تازہ، 144 ریگولر اور 102 فوری نوعیت کے مقدمات شامل تھے، ڈویژن بینچ کے سامنے فوجداری اپیلوں، بریت کے خلاف اپیلوں، سزا کے خلاف اپیلوں، قتل کے ریفرنسز، ضمانتوں، نظرثانی درخواستوں اور مختلف نوعیت کی رٹ درخواستوں سمیت متعدد مقدمات زیر سماعت رہے۔

اعداد و شمار کے مطابق ڈویژن بینچ نے 79 ضمانت بعد از گرفتاری کی درخواستیں نمٹائیں، جبکہ بریت کے خلاف 46 اور سزا کے خلاف 28 اپیلوں کے فیصلے کیے گئے، اسی طرح 19 قتل کے ریفرنسز اور انسداد منشیات کے مقدمات میں سزا کے خلاف 26 اپیلوں سمیت دیگر فوجداری مقدمات بھی نمٹائے گئے۔

دوسری جانب جسٹس غلام سرور نہنگ پر مشتمل سنگل بینچ نے 911 مقدمات اور درخواستیں نمٹائیں، جن میں 216 تازہ، 404 ریگولر اور 291 فوری نوعیت کے مقدمات شامل تھے۔

سنگل بینچ نے 220 ضمانت قبل از گرفتاری اور 52 ضمانت بعد از گرفتاری کی درخواستوں کے فیصلے کیے، جبکہ 40 ہیبیس کارپس درخواستیں بھی نمٹائی گئیں۔

عدالتی اعداد و شمار کے مطابق پولیس کو مقدمہ درج کرنے کی ہدایت سے متعلق 87 رٹ درخواستیں، پولیس کو ہدایات سے متعلق 22 درخواستیں اور ایف آئی آر خارج کرنے سے متعلق 32 درخواستیں بھی نمٹائی گئیں۔

اسی طرح ہراساں کرنے کے خلاف 134 درخواستوں کے فیصلے کیے گئے، جبکہ حراست اور ہیبیس کارپس سے متعلق 58 درخواستیں، ایم پی او کے تحت حراست سے متعلق 18 درخواستیں اور میڈیکل بورڈ سے متعلق 16 درخواستیں بھی نمٹائی گئیں۔

رپورٹ کے مطابق اینٹی کرپشن، تفتیش، ماتحت عدالتوں کو ہدایات، ضمانت اور دیگر فوجداری معاملات سے متعلق درخواستوں کے فیصلے بھی کیے گئے۔

اعداد و شمار کے مطابق 7 ستمبر سے 2 اکتوبر 2026 تک ملتان بینچ میں مجموعی طور پر 348 تازہ، 548 ریگولر اور 393 فوری نوعیت کے مقدمات نمٹائے گئے۔

یوں 26 روز کے دوران لاہور ہائیکورٹ ملتان بینچ کے سنگل اور ڈویژن بینچز نے مجموعی طور پر1289 مقدمات اور درخواستوں کے فیصلے کیے۔