مسلم لیگ (ق) کے سینئر رہنما چودھری موسیٰ الہٰی چودھری وجاہت کے صاحبزادے اور چودھری شجاعت کے بھتیجے ہیں، چودھری موسیٰ الہٰی پی پی 32 سے ایم پی اے اور ایم این اے چودھری حسین الہٰی کے بھائی بھی ہیں۔

چودھری مونس الہیٰ نے کہا کہ سکیورٹی واپس لیں یا جو چاہے کر لیں، نئے صوبے ہر صورت بن کر رہیں گے، نئے صوبوں کے قیام کے مطالبے سے پیچھے نہیں ہٹیں گے۔

اس سے قبل وفاقی وزیر برائے اوورسیز پاکستانیز چودھری سالک حسین سمیت دیگر وفاقی وزراء سے پنجاب پولیس کی جانب سے ایلیٹ فورس کا مستقل پروٹوکول واپس لے لیا گیا۔

پولیس ذرائع کے مطابق ایلیٹ فورس کے اہلکاروں کو واپس رپورٹ کرنے کے احکامات جاری کر دیئے گئے ہیں، جبکہ وفاقی وزراء کو پنجاب آمد پر صرف عارضی پروٹوکول فراہم کیا جائے گا۔

وفاقی وزیر چودھری سالک حسین نے بھی ایلیٹ فورس کا پروٹوکول واپس لیے جانے کی تصدیق کی ہے، اس حوالے سے ترجمان مسلم لیگ نے بھی سکیورٹی واپس لئے جانے کی اطلاعات کو درست قرار دیا ہے۔

ترجمان سالک ہاؤس کے مطابق چودھری سالک حسین کی گجرات میں رہائشگاہ سے بھی پولیس سکیورٹی ہٹا دی گئی ہے۔