نیشنل ہائی وے اتھارٹی (این ایچ اے) کی جانب سے سڑک سے برف صاف کرنے کے بعد گلگت اور خیبر پختونخوا، دونوں اطراف سے ٹریفک کی روانی بحال کر دی گئی ہے۔

 بابوسر ٹاپ کے علاقے میں شدید برف باری کے باعث سڑک پر برف جمع ہونے اور موسم کی خرابی کے نتیجے میں ٹریفک کی آمدورفت معطل ہو گئی تھی، جس سے مسافروں اور سیاحوں کو مشکلات کا سامنا کرنا پڑا۔ تاہم این ایچ اے کے عملے نے سڑک سے برف ہٹانے اور راستہ قابلِ استعمال بنانے کے بعد اسے ٹریفک کے لیے کھول دیا۔

پولیس نے بتایا کہ بابوسر ٹاپ روڈ شام 4 بجے تک ہر قسم کی ٹریفک کے لیے کھلی رہے گی، جبکہ موسم کی شدت، شدید کہر اور ممکنہ خطرات کے پیش نظر شام 4 بجے کے بعد ہر قسم کی ٹریفک کی آمدورفت بند کر دی جائے گی، اس اقدام کا مقصد مسافروں اور سیاحوں کی حفاظت کو یقینی بنانا ہے۔

سڑک کی بحالی سے گلگت بلتستان اور خیبر پختونخوا کے درمیان سفر کرنے والے افراد کو سہولت میسر آئے گی، جبکہ سیاح بھی بابوسر ٹاپ کے برف پوش پہاڑوں، دلفریب قدرتی مناظر اور خوشگوار سرد موسم سے لطف اندوز ہو سکیں گے۔

تاہم بابوسر ٹاپ کے دشوار گزار پہاڑی راستے اور موسم کی غیر یقینی صورتحال کے پیش نظر مسافروں کو ہدایت کی جاتی ہے کہ وہ سفر شروع کرنے سے قبل سڑک کی تازہ ترین صورتحال معلوم کریں، مقررہ اوقات کی پابندی کریں اور متعلقہ حکام کی ہدایات پر عمل کریں تاکہ کسی بھی ناخوشگوار صورتحال سے بچا جا سکے۔