لاہور: (دنیا نیوز) سپورٹس بورڈ نے ساف ویمنز چیمپئن شپ کیلئے ویمنز فٹبال ٹیم کو این او سی جاری کرنے سے انکار کردیا۔
پاکستان سپورٹس بورڈ (پی ایس بی) نے پاکستان ویمنز فٹبال ٹیم کو اس ماہ ہونے والی ساف ویمنز چیمپئن شپ میں شرکت کے لیے این او سی جاری کرنے سے انکار کردیا ہے، ساف ویمنز چیمپئن شپ 17 سے 30 اکتوبر تک نیپال میں منعقد ہونی ہے۔
پاکستان سپورٹس بورڈ کی جانب سے پاکستان فٹبال فیڈریشن (پی ایف ایف) کو بھیجے گئے خط کے مطابق تاخیر سے درخواست کی وصولی اور ضروری دستاویزات پر نارملائزیشن کمیٹی کے چیئرمین کے دستخط نہ ہونے کی وجہ سے این او سی جاری نہیں کیا گیا۔
پی ایس بی کے خط میں واضح کیا گیا ہے کہ 12 ستمبر کو پی ایف ایف کو ہدایت کی یاد دہانی کرائی گئی تھی، تاہم پی ایف ایف کی جانب سے درخواست نہ بروقت ملی اور نہ ہی اس پر چیئرمین نارملائزیشن کمیٹی کے دستخط تھے، خط میں مزید کہا گیا کہ اس طرح کی کوتاہیوں سے پی ایس بی کے لیے درخواست کو پراسس کرنا ممکن نہیں تھا۔
ذرائع کے مطابق پاکستان فٹبال فیڈریشن نے ساف ویمنز کپ کے لیے این او سی کی درخواست 16 ستمبر کو جمع کروائی تھی، تاہم اس درخواست پر پی ایف ایف نارملائزیشن کمیٹی کے چیئرمین ہارون ملک کے بجائے کمیٹی کے ممبر شاہد کھوکھر کے دستخط تھے۔
پاکستان ویمنز فٹبال ٹیم کا تربیتی کیمپ اسلام آباد میں جاری ہے اور ٹیم کو 12 اکتوبر کو نیپال روانہ ہونا تھا تاہم این او سی نہ ملنے سے ٹیم کی ایونٹ میں شرکت پر سوالیہ نشان لگ گیا ہے۔
