کراچی: (دنیا نیوز) عالمی انڈر19 والی بال چیمپئن شپ میں پاکستان کی شکست کا سبب بننے والے متنازع فیصلوں پر منتظمین نے معافی مانگ لی۔
غیر ملکی میڈیا رپورٹ کے مطابق ازبکستان کے شہر تاشقند میں جاری چیمپین شپ کے راؤنڈ 16 میچ میں پاکستان کے خلاف ریفری نے فیصلہ کن پانچوں سیٹ کے آخری لمحات میں پولینڈ کے حق میں دو متنازع فیصلے دیے جو قومی جونیئر ٹیم کی ناکامی کا باعث بنے۔
پاکستان والی بال فیڈریشن کے چیئرمین چوہدری محمد یعقوب نے بتایا کہ قومی ٹیم کے منیجر نے ایف آئی وی بی کنٹرول کمیٹی کو کیمرے، کمپیوٹر پر مذکورہ فیصلوں کاجائزہ لینے کی درخواست کی، ذمہ داران نے غلطی تسلیم کرتے ہوئے معذرت کی لیکن فیصلہ تبدیل نہیں کیا گیا۔
قومی فیڈریشن کے چیئرمین نے کہا کہ اصولی طور پر عالمی ایونٹ میں ریویو لینے کے انتظامات ضروری تھے تاہم یہ امر باعث تقویت ہے کہ انٹرنیشنل والی بال فیڈریشن نے معاملے کا جائزہ لینے کا عندیہ دے دیا ہے، قومی جونیئر کھلاڑیوں نے کھیل کے تمام شعبوں میں شاندار کھیل کا مظاہرہ کیا، کوچز اور آفیشلز نے بھی اپنی ذمہ داریاں بخوبی احسن انجام دیں۔
