اوسلو:(دنیا نیوز) پاکستان کی نمائندہ فٹ بال ٹیم ’بیٹر فیوچر‘نے ناروے کپ انڈر15 ٹورنامنٹ میں شاندار کارکردگی کا مظاہرہ کرتے ہوئے فائنل تک رسائی حاصل کر لی ہے۔
سیمی فائنل میں بیٹر فیوچر نے میزبان ملک ناروے کے مقامی کلب یالاروسین کو 1 کے مقابلے میں 4 گول سے شکست دے کر فائنل کا ٹکٹ کٹوا لیا۔
اس سے قبل کھیلے گئے کوارٹر فائنل میں پاکستانی ٹیم نے گریکن کلب کو 2-4 سے زیر کیا تھا، ٹیم کی مسلسل کامیابیاں نہ صرف پاکستانی نوجوان ٹیلنٹ کی عکاسی کرتی ہیں بلکہ بین الاقوامی سطح پر فٹ بال میں پاکستان کی مثبت شناخت بھی اجاگر کر رہی ہیں۔
خیال رہے ٹورنامنٹ کا فائنل میچ کل کھیلا جائے گا، جہاں بیٹر فیوچر کا سامنا ناروے کے ایک اور مضبوط حریف کلب یووکلین سے ہوگا۔
یاد رہے یہ کامیابی نوجوان پاکستانی فٹ بالرز کی انتھک محنت، لگن اور نظم و ضبط کا نتیجہ ہے، اور مستقبل میں بین الاقوامی فٹ بال میں پاکستان کی پیش قدمی کے امکانات کو روشن کرتی ہے۔
