فائنل میں دونوں ٹیموں کے کھلاڑیوں نے بہترین کھیل پیش کیا جبکہ سٹیڈیم میں موجود شائقین کرکٹ نے بھی مقابلے سے بھرپور لطف اٹھایا، فائنل میچ کے مہمان خصوصی کمانڈر 12 کور لیفٹیننٹ جنرل عنایت حسین تھے، جبکہ آئی جی ایف سی بلوچستان نارتھ میجر جنرل عاطف مجتبیٰ سمیت دیگر اعلیٰ سول و عسکری حکام، کھیلوں سے وابستہ شخصیات اور شائقین کی بڑی تعداد بھی تقریب میں موجود تھی۔

فائنل مقابلے میں کوئٹہ بیئرز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں شاندار بیٹنگ کرتے ہوئے 196 رنز کا بڑا مجموعہ ترتیب دیا، جواب میں چاغی اسکارپیئنز کی ٹیم ہدف کے تعاقب میں بھرپور کوشش کے باوجود مطلوبہ رفتار برقرار نہ رکھ سکی اور 154 رنز بنا کر آؤٹ ہوگئی۔

اس طرح کوئٹہ بیئرز نے 32 رنز کے واضح مارجن سے کامیابی حاصل کرتے ہوئے ٹورنامنٹ کا ٹائٹل اپنے نام کرلیا۔

میچ کے اختتام پر منعقدہ تقسیمِ انعامات کی پروقار تقریب میں مہمان خصوصی کمانڈر 12 کور لیفٹیننٹ جنرل عنایت حسین نے فاتح اور رنر اپ ٹیموں کے کھلاڑیوں میں انعامات تقسیم کیے۔

ٹورنامنٹ کی فاتح ٹیم کوئٹہ بیئرز کو 15 لاکھ روپے نقد انعام کے ساتھ ونر ٹرافی دی گئی، جبکہ رنر اپ ٹیم چاغی اسکارپیئنز کو 7 لاکھ روپے نقد انعام اور ٹرافی سے نوازا گیا۔

اس موقع پر کھلاڑیوں کی کارکردگی کو سراہا گیا اور کھیلوں کے فروغ، نوجوانوں کو مثبت سرگرمیوں کی جانب راغب کرنے اور بلوچستان میں کرکٹ کے ٹیلنٹ کو سامنے لانے کی اہمیت اجاگر کی گئی۔

تقریب کے اختتام پر چاغی سٹیڈیم میں شاندار آتش بازی کا مظاہرہ کیا گیا، جس نے تقریب کی رونق کو مزید دوبالا کردیا، رنگ برنگی روشنیوں سے جگمگاتے سٹیڈیم میں موجود شائقین نے آتش بازی سے خوب لطف اٹھایا۔

گرینڈ بلوچستان کرکٹ لیگ کا یہ فائنل بلوچستان میں کھیلوں کی سرگرمیوں کے فروغ اور مقامی کھلاڑیوں کو اپنی صلاحیتوں کے اظہار کے مواقع فراہم کرنے کے حوالے سے ایک اہم اور یادگار ایونٹ ثابت ہوا۔