لاہور: (ویب ڈیسک) شعبہ فلکیات میں بے مثال خدمات انجام دینے پر طبیعات کا نوبیل انعام تین سائنسدانوں نے اپنے نام کر لیا ہے۔
برطانوی خبر رساں ادارے کے مطابق نوبیل انعام کے حکام نے طبیعات کے نوبیل انعام کے فاتحین کا اعلان کیا، رواں سال میں فزکس کا نوبیل انعام جیمز پیبلز، مائیکل میئر اور ڈیڈیئر کلاز کے نام رہا۔ یہ انعام انہیں فزکس کے شعبہ فلکیات میں بے مثال تحقیق کرنے پر دیا گیا ہے۔
BREAKING NEWS:
— The Nobel Prize (@NobelPrize) October 8, 2019
The 2019 #NobelPrize in Physics has been awarded with one half to James Peebles “for theoretical discoveries in physical cosmology” and the other half jointly to Michel Mayor and Didier Queloz “for the discovery of an exoplanet orbiting a solar-type star.” pic.twitter.com/BwwMTwtRFv
خبر رساں ادارے کے مطابق نوبیل انعام تقسیم کرنے والی رائل سوئیڈش اکیڈمی آف سائنسز کا کہنا تھا کہ امسال کے فاتحین نے کائنات کے بارے میں ہمارے خیالات کو تبدیل کر دیا ہے۔ جیمز پیبلز کی دریافتوں سے کائنات کی تخلیق کے بارے میں جاننے میں مدد ملی جبکہ مائیکل میئر اور ڈیڈیئر کلاز نے نامعلوم سیاروں کی تلاش میں مدد دی۔
منتظمین کے بقول سائنس دانوں کی دریافتوں نے دنیا کے بہت سارے تصورات کو ہمیشہ کیلئے بدل ڈالا ہے۔ طبیعات کے نوبیل کی انعامی رقم نو لاکھ 10 ہزار ڈالرز (تقریباً 14 کروڑ پاکستانی روپے) ہے جس میں سے آدھی رقم پیبلز کو دے جائے گی جبکہ نصف مائیکل میئر اور ڈیڈیئر کلاز میں برابر تقسیم ہو گی۔
یاد رہے کہ ہر سال نوبیل پرائز جیتنے والوں کے ناموں کا اعلان سب سے پہلے طب کے شعبے کے فاتحین سے کیا جاتا ہے۔ گزشتہ روز طب کا نوبیل انعام بھی تین ڈاکٹروں نے جیتا تھا جن میں ولیم کیلن،گریگ سیمینزا اور پیٹر ریٹکلف شامل تھے۔
معروف سائنس دان اور ڈائنامائٹ کے موجد الفریڈ نوبیل سے منسوب نوبیل پرائز سب سے پہلے 1901ء میں سائنس، ادب اور امن کے شعبوں میں دیا گیا تھا۔
