ویٹی کن سٹی: (ویب ڈیسک) جہاں ایک طرف دنیا آبادی کے مسائل سے نمٹنے میں مصروف ہے وہیں ایک ایسا ملک بھی ہے جہاں پچھلے 96 سال سے کسی بچے کی پیدائش نہیں ہوئی ہے۔
حیران کن طور پر اس ملک میں کوئی ہسپتال بھی موجود نہیں، کیا آپ یقین کریں گے کہ 21 ویں صدی میں بھی کوئی ایسا ملک ہے جہاں ہسپتال نہ ہو؟ یہ ملک دنیا کا سب سے چھوٹا ملک بھی ہے اور رومن کیتھولک عیسائیت کے تمام بڑے رہنما یہاں رہائش پذیر ہیں، اس ملک کا نام ”ویٹی کن سٹی“ ہے۔
ویٹی کن سٹی دنیا کا سب سے چھوٹا ملک ہے اور اس کی کئی حیران کن خصوصیات میں سے ایک یہ ہے کہ یہاں گزشتہ 96 سالوں میں کسی بچے کی پیدائش نہیں ہوئی، یہ ملک 11 فروری 1929 کو وجود میں آیا تھا، لیکن تب سے اب تک یہاں کوئی پیدائش درج نہیں ہوئی۔
یہ ملک کیتھولک عیسائی برادری کا مرکز ہے، جہاں سے دنیا بھر کی کیتھولک چرچز اور ان کے پادریوں کا انتظام کیا جاتا ہے۔
ویٹی کن سٹی کے قیام کے بعد سے یہاں کوئی ہسپتال تعمیر نہیں کیا گیا، کئی بار ہسپتال بنانے کی درخواست کی گئی، لیکن ہر بار اسے مسترد کر دیا گیا، اسی وجہ سے شدید بیمار افراد یا حاملہ خواتین کو اٹلی کے دارالحکومت روم کے ہسپتالوں میں بھیجا جاتا ہے، قابل ذکر بات یہ ہے کہ ویٹی کن سٹی، روم کے اندر واقع ہے۔
ویٹی کن سٹی کا کل رقبہ صرف 118 ایکڑ ہے اور یہاں کوئی ہسپتال یا زچگی وارڈ موجود نہیں، جس کے باعث یہاں کسی بچے کی پیدائش ممکن نہیں، یہ شاید سب سے بڑی وجہ ہے کہ گزشتہ 96 سال میں یہاں کوئی بچہ پیدا نہیں ہوا۔
ویٹی کن سٹی کی آبادی 800 سے 900 افراد پر مشتمل ہے، جن میں زیادہ تر رومن کیتھولک پادری شامل ہیں۔
دلچسپ بات یہ ہے کہ اس چھوٹے سے ملک میں جرائم کی شرح کئی دوسرے ممالک کے مقابلے میں زیادہ بتائی جاتی ہے، اس کی بنیادی وجہ یہاں آنے والے لاکھوں سیاح ہیں، جن کی وجہ سے چھوٹے موٹے جرائم رونما ہوتے ہیں۔
