لاس اینجلس: (دنیا نیوز) امریکا کے شہر لاس اینجلس میں آگ کی تباہ کاریاں جاری ہیں، اموات کی تعداد 25 ہوگئی جبکہ 23 افراد لاپتہ ہیں۔
غیر ملکی میڈیا کے مطابق آگ مزید پھیلنے کا خدشہ بڑھ گیا، آتشزدگی سے 12 ہزار سے زائد گھر راکھ میں تبدیل ہوگئے، کیلیفورنیا کے گورنر نے نیشنل گارڈ کے مزید ایک ہزار اہلکار تعینات کرنے کا اعلان کر دیا۔
شمال اور شمال مشرق میں 35 سے 55 میل فی گھنٹہ کی رفتار سے ہوائیں چلنے کا امکان ہے، ہواؤں کی وجہ سے ایل اے کاؤنٹی کا پورا علاقہ آگ کے خطرے میں پڑ نے کا خدشہ ہے، آگ کے شعلے کم ہوگئے مگر خطرہ برقرار ہے۔
غیر ملکی میڈیا کے مطابق آگ سے مالی نقصان کا تخمینہ 200 ارب ڈالر سے بڑھ گیا، مختلف مقامات پر لگی آگ اب تک تقریباً 40 ہزار ایکڑ رقبے کو جلا کر خاکستر کرچکی ہے، مزید 90 ہزار سے زائد افراد کو انخلاء کے نئے احکامات جاری کردیئے ہیں۔
