سڈنی : (دنیا نیوز) آسٹریلیا کے وزیرِاعظم انتھونی البانیز ایک بار پھر وزارت عظمیٰ کیلئے منتخب ہوگئے، پاکستان کے وزیراعظم شہبازشریف نے مبارکباد دیتے ہوئے مل کر کام کرنے کی خواہش کا اظہار کر دیا۔
بائیں بازو کے آسٹریلوی سیاستدان نے قومی انتخابات میں اپنے حریف قدامت پسند لبرل نیشنل اتحاد کے پیٹرڈٹن کو بھاری اکثریت سے شکست دی ہے، اپوزیشن جماعت کے پیٹرڈٹن نے وزیرِاعظم انتھونی البانیز کو فون کر کے انتخابات میں کامیابی پر مبارکباد دے دی۔
اپنے حامیوں سے خطاب میں سخت گیر پیٹر ڈٹن نے کہا کہ ہم انتخابی مہم کے دوران خاطر خواہ کارکردگی نہیں دکھا سکے اور میں اس شکست کی پوری ذمہ داری قبول کرتا ہوں، سابق پولیس افسر پیٹر ڈٹن کی اپنی نشست میں بھی خطرے میں پڑ گئی تھی۔
آسٹریلوی وزیر اعظم انتھونی البانیز نے انتخابی مہم کے دوران قابل تجدید توانائی کو اپنانے، بگڑتے ہوئے رہائشی بحران سے نمٹنے اور بوسیدہ صحت کے نظام میں سرمایہ کاری کرنے کا وعدہ کیا ہے۔
دوسری جانب ان کے حریف پیٹر ڈٹن نے اپنی مہم کے دوران امیگریشن میں بڑی کٹوتی، جرائم کے خلاف سخت کارروائی اور جوہری توانائی پر طویل عرصے سے عائد پابندی ختم کرنے کے وعدے کیے تھے۔
دوسری طرف پاکستان کے وزیر اعظم شہباز شریف نے آسٹریلیا کے وزیراعظم انتھونی البانیز کو دوبارہ منتخب ہونے پر مبارکباد دی ہے۔
اپنے ٹوئٹ میں انہوں نے کہا کہ دعاگو ہیں کہ آسٹریلیا کے عوام کی خدمت کا یہ سلسلہ جاری رہے۔
وزیر اعظم نے یہ بھی لکھا کہ وہ وزیر اعظم انتھونی کے ساتھ مل کر دونوں ملکوں کے تعلقات کو مزیدمستحکم بنانے اورامن، ترقی اور علاقائی تعاون کے مشترکہ عزم کیلئے مل کر کام کرنے کے خواہش مند ہیں۔
