مکہ مکرمہ: (دنیا نیوز) سعودی عرب نے خطبہ عرفہ 35 زبانوں میں ترجمہ و نشریات کے ذریعے 50 لاکھ مسلمانوں تک پہنچانے کا اعلان کر دیا۔
مقامی میڈیا کی رپورٹ کے مطابق مسجد الحرام اور مسجد نبویؐ کے امورِ دینیہ کی صدارت نے رواں سال حج 1446ھ کے موقع پر خطبہ عرفہ کے ترجمے اور نشریات کے لئے ایک بین الاقوامی اقدام کا آغاز کر دیا ہے، جس کا مقصد 35 زبانوں میں ترجمے کے ذریعے دنیا بھر کے پانچ ملین سے زائد مسلمانوں تک اس پیغام کو پہنچانا ہے۔
یہ اقدام صدارت کی تاریخ کا سب سے بڑا ’’امداد و ابلاغی پیکیج‘‘ قرار دیا گیا ہے، جس کا مقصد حجاج کرام کے روحانی تجربے کو مزید بامعنی بنانا اور خطبہ عرفہ کے اعتدال اور توازن پر مبنی پیغام کو عالمی سطح پر عام کرنا ہے۔
اس منصوبے میں رواں ترجمے، ڈیجیٹل سٹریمنگ اور سوشل میڈیا پلیٹ فارمز کے ذریعے براہ راست نشریات شامل ہوں گی، یہ منصوبہ صدر امورِ دینیہ شیخ ڈاکٹر عبدالرحمٰن السدیس کی زیر صدارت مسجد الحرام میں ان کے دفتر میں منعقدہ اجلاس کے دوران باقاعدہ طور پر شروع کیا گیا۔
اجلاس میں حج سیزن کے حوالے سے تیاریوں کا جائزہ لیا گیا اور خطبہ عرفہ کے مؤثر ترسیل کے لئے صدارت کی مکمل تیاری کو یقینی بنایا گیا، شیخ السدیس نے اس موقع پر کہا کہ خادم الحرمین الشریفین کے زیر سرپرستی خطبہ عرفہ کے ترجمے کا یہ منصوبہ مملکت سعودی عرب کی مذہبی اعتدال پسندی اور عالمگیر ہم آہنگی کے فروغ میں قائدانہ کردار کا مظہر ہے۔
انہوں نے کہا کہ یہ اقدام رواداری، بقائے باہمی اور اسلام کے معتدل پیغام کو دنیا تک پہنچانے کے مملکت کے عزم کو اجاگر کرتا ہے، انہوں نے کہاکہ یہ اقدام صدارت کے اس مشن کا اہم حصہ ہے جس کا مقصد اللہ کے مہمانوں کے روحانی سفر کو مؤثر بنانا اور اسلام کا معتدل پیغام پوری دنیا میں عام کرنا ہے۔
