دنیا اب اسرائیل کے خلاف حرکت میں آئے، ہمدردی کے بیانات کافی نہیں: فلسطین

Published On 11 August,2025 09:23 am

نیویارک: (ویب ڈیسک) اقوام متحدہ میں فلسطینی مندوب ریاض منصور نے سلامتی کونسل سے خطاب کرتے ہوئے کہا ہے کہ ہمدردی کے بیانات کافی نہیں دنیا کو اب حرکت میں آنا ہو گا۔

انہوں نے اسرائیل کے ہاتھوں جاری فلسطینیوں کی نسل کشی پر عالمی برادری کی خاموشی پر شدید تنقید کی اور کہا کہ اگر عالمی ادارے صرف بیانات تک محدود رہے تو ان کا وجود بے معنی ہو جائے گا۔

فلسطینی مندوب نے کہا کہ فلسطینیوں کی نسل کشی فوری طور پر روکی جائے، صرف تجزیے اور قراردادیں کافی نہیں، اب عملی اقدامات کی ضرورت ہے، اسرائیل کو نہ فلسطینی عوام کی تکلیف کی پرواہ ہے، نہ عالمی رائے عامہ کی۔

ریاض منصور نے فلسطینی عوام کا درد محسوس کرنے والی تمام اقوام اور افراد کا شکریہ ادا کرتے ہوئے کہا کہ جو کچھ ہو رہا ہے، اس کا فیصلہ تاریخ کرے گی اور ذمہ داروں کو ایک نہ ایک دن جوابدہ ٹھہرایا جائے گا۔

فلسطینی مندوب نے کہا کہ اسرائیل عالمی قوانین، اقوام متحدہ کے چارٹر اور قراردادوں کی کھلم کھلا خلاف ورزی کر رہا ہے، اگر اسرائیل کسی قانون کو نہیں مانتا تو وہ اقوام متحدہ میں بیٹھا کیوں ہے؟

انہوں نے سوال اٹھایا کہ سلامتی کونسل جن آلات اور اقدامات کو دیگر ممالک پر استعمال کرتی ہے، انہیں اسرائیل کے خلاف کیوں نہیں اپنایا جا رہا؟ غزہ کے عوام ناقابل برداشت اذیت سہہ رہے ہیں۔