میکسیکو: (ویب ڈیسک) امریکی ریاست ٹیکساس کے ساحل کے قریب میکسیکن بحریہ کا ایک طیارہ سمندر میں گر کر تباہ ہو گیا جس کے نتیجے میں پانچ افراد ہلاک جبکہ ایک شخص تاحال لاپتا ہے۔
عالمی میڈیا کی رپورٹ میں میکسیکن بحریہ کے سیکرٹریٹ کے حوالے سے بتایا کہ یہ طیارہ انسانی ہمدردی پر مبنی طبی منتقلی کے مشن پر تھا، اس میں مجموعی طور پر آٹھ افراد سوار تھے۔
بحریہ کے بیان کے مطابق ایک مسافر اب بھی لاپتا ہے جس کی تلاش کے لئے امریکی کوسٹ گارڈ کاسرچ آپریشن جاری ہے، حادثہ اس وقت پیش آیا جب طیارہ گیلوسٹن ٹیکساس کے قریب پہنچ رہا تھا، یہ خصوصی طبی پرواز ایک میکسیکن فاؤنڈیشن کے تعاون سے انجام دی جا رہی تھی جو شدید جھلسنے والے بچوں کے علاج میں معاونت فراہم کرتی ہے۔
رپورٹ میں بتایا گیا ہے کہ فلائٹ ٹریکنگ ویب سائٹ فلائٹ ریڈار کے مطابق طیارے نے میکسیکو کی ریاست یوکاٹن کے شہر میریدا سے 18:46 جی ایم ٹی پر اڑان بھری تھی اور آخری بار 21:01 جی ایم ٹی پر گیلوسٹن بے کے اوپر سکولز انٹرنیشنل ایئرپورٹ کے قریب دیکھا گیا، حادثے کی وجوہات جاننے کے لئے تحقیقات جاری ہیں۔
