ماسکو(شاہد گھمن سے) روسی صدر ولادیمیر پوتن نے کہا ہے کہ یوکرین میں جنگ لڑنے والے روسی فوجی ہمارے ہیرو ہیں، پوری قوم ان کے ساتھ کھڑی ہے۔
دنیا بھر کی طرح روس میں بھی نئے سال 2026 کو بھرپور جوش و جذبے کے ساتھ خوش آمدید کہا گیا۔ اگرچہ سکیورٹی خدشات کے پیشِ نظر ریڈ سکوائر پر سرکاری طور پر آتش بازی نہیں کی گئی، تاہم اس کے باوجود عوام الناس نے اپنے اپنے علاقوں میں آتش بازی کر کے نئے سال کا جشن منایا، ماسکو سمیت مختلف شہروں میں سڑکیں، رہائشی علاقے اور عوامی مقامات روشنیوں اور خوشی کے مناظر سے بھرے رہے۔
نئے سال کی آمد سے قبل رات 11 بج کر 55 منٹ پر روسی صدر ولادیمیر پوتن نے قوم سے براہِ راست ٹیلی وژن خطاب کیا اور کہا کہ روسی عوام کی ذاتی امیدیں اور منصوبے مادرِ وطن کی تقدیر سے جڑے ہوئے ہیں، اور قومی ترقی کا راستہ اتحاد اور باہمی اعتماد سے ہو کر گزرتا ہے۔
صدر پوتن نے خصوصی طور پر روسی مسلح افواج اور خصوصی فوجی آپریشن میں شریک اہلکاروں کو نئے سال کی مبارکباد دیتے ہوئے کہا کہ پوری قوم ان کے ساتھ کھڑی ہے اور ان پر فخر کرتی ہے، انہوں نے اس اعتماد کا اظہار کیا کہ روسی عوام کو اپنی افواج پر مکمل یقین ہے۔
روسی صدر کا کہنا تھا کہ قومی اتحاد ہی ملک کی خودمختاری، سلامتی اور روشن مستقبل کی ضمانت ہے، انہوں نے عوام کو صحت، خوشحالی، باہمی ہم آہنگی اور محبت کی دعاؤں کے ساتھ نئے سال کی مبارکباد دی۔
پوتن نے یوکرین میں لڑنے والے روسی فوجیوں کو ہیرو قرار دیتے ہوئے عوام سے ان کی حمایت کی اپیل کی ہے اور فوجیوں سے کہا کہ ہمیں آپ پر اور اپنی فتح پر یقین ہے۔
