خبر ایجنسی کے مطابق قطری وزارتِ ٹرانسپورٹ نے اعلان کیا ہے کہ اگلے نوٹس تک تمام جہاز رانی، بحری آمدورفت اور دیگر سمندری سرگرمیاں عارضی طور پر بند رہیں گی۔

وزارتِ ٹرانسپورٹ کا کہنا ہے کہ یہ فیصلہ فوری طور پر نافذ العمل ہے، جبکہ بحری سرگرمیوں کی بحالی سے متعلق آئندہ ہدایات بعد میں جاری کی جائیں گی۔

اعلامیے میں مزید کہا گیا کہ فیصلہ موجودہ صورتحال کے پیش نظر احتیاطی اقدام کے طور پر کیا گیا ہے تاکہ سمندری حدود میں انسانی جانوں اور بحری سرگرمیوں کے تحفظ کو یقینی بنایا جا سکے۔

اس دوران تمام متعلقہ اداروں کو ہدایت کی گئی ہے کہ وہ پابندی پر مکمل عمل درآمد یقینی بنائیں۔

تاہم وزارت نے واضح کیا ہے کہ بین الاقوامی بحری کنونشنز اور عالمی قوانین کے تحت سفر کرنے والے جہازوں کو اس فیصلے سے استثنیٰ حاصل ہوگا۔