نگران وزیر تجارت ڈاکٹر گوہر اعجاز کا بزنس پارکس کے قیام کا اعلان

Published On 22 August,2023 05:58 pm

اسلام آباد: (دنیا نیوز) نگران وزیر تجارت نے بزنس پارکس کے قیام کا اعلان کر دیا۔

نگران وزیر تجارت و صنعت ڈاکٹر گوہر اعجاز سے ممتاز ایکسپورٹرز اور تاجروں نے ملاقات کی، ملاقات میں تجارت کو بڑھانے کے لیے ملک میں بزنس پارکس کے قیام کی اعلان کیا گیا۔

ڈاکٹر گوہر اعجاز نے کہا عالمی تجارتی رابطوں کو مستحکم کرنے کے لئے بڑے شہروں میں بزنس پارکس قائم کرنے کا پلان ہے، ملک کی برآمدات میں اضافے کے لئے سٹریٹجک نقطہ نظر اپنانے کی ضرورت ہے۔

گوہر اعجاز نے کہا یہ پارکس یا سہولت مراکز تجارتی تعلقات کو بڑھانے اور اقتصادی ترقی کو آگے بڑھانے کے لئے بنائے جائیں گے، پاکستان کی برآمدی صلاحیت کو بروئے کار لانے کے لیے ہر ممکن راستے تلاش کریں گے۔

گوہر اعجاز نے کہا بزنس پارکس عالمی سطح پر پاکستان کی معاشی ترقی اور خوشحالی کے لیے اہم سنگ میل ثابت ہوں گے، بزنس پارکس کی قیام کے حوالے سے بزنس کمیونٹی سے تجاویز مانگی ہیں۔

نگران وزیر تجارت و صنعت نے کہا مقامی کاروباری برادری کے زیر انتظام بائنگ ہاؤسز اور کرائے کی عمارتوں کا استعمال بھی زیر غور ہے، ان اقدامات کا مقصد ملکی اور غیر ملکی تاجروں کو سہولت فراہم کرنا ہے۔
 

Advertisement