کراچی: (دنیا نیوز) ملٹی نیشنل کمپنی لوٹے کیمیکل کوریا کا پاکستان سے دستبرداری کا فیصلہ، پاکستان اسٹاک ایکسچیبج کو مطلع کر دیا گیا۔
لوٹے کیمیکلز کارپوریشن (ایل سی سی کوریا) کے بورڈ آف ڈائریکٹرز نے پاکستانی ذیلی کمپنی میں اپنی مکمل حصص فروخت کرنے کے لیے ایشیا پاک انویسٹمنٹس لمیٹڈ اور مانٹیج آئل ڈی ایم سی سی کے ساتھ شیئر پرچیز ایگریمنٹ (ایس پی اے) پر دستخط کیے ہیں۔
ایل سی پی ایل نے پاکستان سٹاک ایکسچینج کو ایک نوٹس کے ذریعے اس پیش رفت سے آگاہ کیا, نوٹس میں کہا گیا کہ لوٹے کیمیکلز کارپوریشن کمپنی کے تمام شیئرز کو فروخت کی جائے (یعنی 1,135,860,105 شیئرز جو کمپنی کے جاری کردہ اور ادا شدہ سرمایہ کا تقریباً 75.01 فیصد ہیں) جو کہ ایل سی سی کوریا کے کاروباری پورٹ فولیو کی تبدیلی کا حصہ ہے۔
واضح رہے کہ گزشتہ ہفتے پاکستان اور ہانگ کانگ میں آپریشنل اثاثے رکھنے والی نجی سرمایہ کاری فرم ایشیا پاک انویسٹمنٹ اور مشرق وسطیٰ کی تیل و گیس کمپنی مونٹیج آئل نے لوٹے کیمیکل پاکستان میں 75.01 فیصد حصص کے لیے بولی لگائی تھی۔
کوریا کی پیرنٹ کمپنی لوٹے کیمیکل کارپوریشن نے اپنے طویل المیعاد وژن سے مطابقت نہ ہونے کی وجہ سے پاکستانی یونٹ کو فروخت کے لیے پیش کیا تھا، لیکن کمپنی کے پچھلے دو سودے ناکام ہوچکے ہیں، جو اس وقت 32.1 ارب روپے (تقریباً 115 ملین ڈالر) کی مارکیٹ کیپٹلائزیشن رکھتی ہے۔
