لاہور: (دنیا نیوز) وزیراعلیٰ پنجاب مریم نواز شریف نے لاہور میں سٹیٹ آف دی آرٹ سعودی جرمن ہسپتال کا سنگ بنیاد رکھ دیا۔
وزیراعلیٰ مریم نواز شریف نے بتر جی گروپ کے سربراہ صو بھی بتر جی کے ساتھ بٹن دبا کر سعودی جرمن ہسپتال کا سنگ بنیاد رکھا، لاہور بتر جی میڈیکل سٹی میں مجموعی طور پر 500 بیڈز ہوں گے، سعودی جرمن ہسپتال لاہور 300 بیڈز پر مشتمل ہوگا۔
سعودی جرمن ہسپتال 250 ملین ڈالرز سے تعمیر ہوگا، سعودی جرمن ہسپتال دنیا بھر کی جدید طبی ٹیکنالوجی اور معیاری علاج کی خدمات کے لئے نمایاں ہے، ہسپتال لاہور سمیت پنجاب بھر کے عوام کو اعلیٰ معیار کی جدید طبی سہولیات فراہم کرے گا، سعودی جرمن ہسپتال کو جدید میڈیکل ٹیکنالوجی اور بین الاقوامی معیار کی سہولتوں سے آراستہ کیا جائے گا۔
لاہور میں قائم ہونے والے سعودی جرمن ہسپتال سے نوجوانوں کو روزگار کے نئے مواقع میسر ہونگے، سعودی جرمن ہسپتال نیٹ ورک سعودی عرب، متحدہ عرب امارات، مصر، مراکش اور یمن میں کامیابی سے خدمات فراہم کر رہا ہے۔
وزیراعلیٰ پنجاب مریم نواز نے کہا ہے کہ پنجاب میں ہیلتھ سسٹم میں بہتری کیلئے نجی شعبے کا خیر مقدم کریں گے، پنجاب کا پورا ہیلتھ سسٹم بدلنا اور بہتر کرنا چاہتی ہوں، نیا ہسپتال صحت عامہ میں بہتری اور فلاحی معاشرے کے قیام کے لئے سنگ میل ثابت ہوگا۔
