اسلام آباد: (دنیا نیوز) تاجروں اور صنعتکاروں نے وزیراعظم شہباز شریف کے بجلی کی قیمتوں میں کمی کے اعلان کا خیرمقدم کرتے ہوئے کہا کہ اتنے بڑے ریلیف کی توقع نہیں کر رہے تھے۔
وزیر اعظم ریلیف پیکیج کے بعد تاجر برادری نے میڈیا سے گفتگو کی، صدر ایف پی سی سی آئی عاطف اکرام شیخ نے کہا کہ ریلیف پیکیج گھریلو صارفین اور انڈسٹری کیلئے خوش آئند ہے۔
انہوں نے کہا کہ بجلی قیمتوں میں فی یونٹ 7 روپے 41 پیسے کا ریلیف خوش آئند ہے، اس اقدام سے برآمدات میں بہتری آئے گی، شرح سود میں کمی ہوئی ہے، ملک اچھی سمت میں جا رہا ہے۔
یونائیٹڈ بزنس گروپ (یو بی جی) کے پیٹرن انچیف ایس ایم تنویر نے کہا کہ ریلیف پیکیج پر پوری کاروباری برادری کو مبارکباد پیش کرتا ہوں، وزیراعظم اور آرمی چیف کے مشکور ہیں۔
انہوں نے کہا کہ آئی پی پیز کے ساتھ غلط معاہدے ہوئے تھے، ہم نے یہ ثابت کر دیا کہ آئی پی پیز کے ساتھ معاہدے غلط تھے، آج کا ریلیف گھریلو صارفین سمیت انڈسٹری اور کمرشل کیلئے بھی ہے۔
ایس ایم تنویر نے کہا کہ حکومت نے بند جنکوز کو فروخت کیا، جنکوز کی فروخت سے 9 ارب روپے قومی خزانے میں آئے، ڈسکوز کی نجکاری سے 600 ارب کی چوری رکے گی، اگلے 6 مہینے میں شرح سود 9 فیصد پر آئے گی۔
انہوں نے کہا کہ ہم پہلے دن سے کہہ رہے تھے کہ بجلی کو سستا کیا جائے، پُرامید ہوں حکومت بجلی کے ریٹ کو مزید کم کرے گی، پہلی جنگ 80 فیصد جیت چکے ہیں، شرح سود بھی انشااللہ کم ہوگی، کاٹن کے حوالے سے بھی کام ہو رہا ہے۔
ایک سوال کے جواب میں ایس ایم تنویر کا کہنا تھا کہ حکومت مختلف مراحل میں اقدامات کر رہی ہے، آنے والے دنوں میں 40 مزید آئی پی پیز سے بات ہوگی، حکومت سرکاری آئی پی پیز اور سی پیک کے آئی پی پیز سے بات کر رہی ہے۔
ایس ایم تنویر نے کہا کہ ان اقدامات سے بجلی مزید 6 روپے فی یونٹ کمی ہوگی، ان اقدامات کے بعد فی یونٹ 9 سینٹ پر جائے گا۔
ایف پی سی سی آئی کے ایک عہدیدار نے کہا کہ وزیراعظم کا اعلان بڑا خوش آئند ہے، صدر ایف پی سی سی آئی عاطف اکرام شیخ، گوہراعجاز، ایس ایم تنویر نے یہ معاملہ اٹھایا، شکر گزار ہوں۔
ایف پی سی سی آئی کے عہدیدار نے کہا کہ یہ عید کے بعد ایک نئی خوشی ہے، ہم نے جو ریلیف مانگے تھے وہ ہمیں مل گئے ہیں، اب ہم نے اپنی پروڈکشن بڑھانی ہے۔
بجلی کی قیمتوں میں کمی کاروباری برادری کیلئے خوش آئند: ایل سی سی آئی
لاہور چیمبر آف کامرس اینڈ انڈسٹری کی جانب سے وزیراعظم شہباز شریف کے بجلی کی قیمتوں میں کمی کے اعلان کا خیر مقدم کیا گیا ہے۔
صدر لاہور چیمبر آف کامرس میاں ابوذر شاد نے کہا کہ بجلی کی قیمتوں میں نمایاں کمی لاہور چیمبر آف کامرس کا دیرینہ مطالبہ تھا، بجلی کی قیمتوں میں کمی کاروباری طبقے کے لیے خوش آئند فیصلہ ہے۔
میاں ابوذر شاد نے کہا کہ وزیراعظم کے فیصلے سے برآمدات اور پیداواری صلاحیت میں اضافہ ہوگا، حکومت کے کاروبار دوست اقدامات معیشت کی بحالی کے لیے کلیدی ہیں۔
سینئر نائب صدر انجینئر خالد عثمان نے کہا کہ وزیراعظم کا اقدام معیشت کی بحالی کی جانب اہم قدم ہے، کاروباری برادری وزیراعظم کے ریلیف اقدام کو سراہتی ہے۔
نائب صدر شاہد نذیر چودھری نے کہا کہ حکومت کے اس فیصلے سے صنعتی ترقی کو تقویت ملے گی، بجلی کی قیمتوں میں کمی سے کاروباری لاگت میں کمی آئے گی، مہنگائی کا دباؤ کم ہوگا۔
