اسلام آباد: (مدثر علی رانا) آئی ایم ایف کی شرائط اور اہداف پر رائٹ سائزنگ پالیسی کی رفتار تیز کرنے کا فیصلہ کر لیا گیا۔
رواں مالی سال کے اختتام تک 30 جون کے اہداف حاصل کرنے کا ٹاسک دے دیا گیا جبکہ وفاقی حکومت رائٹ سائزنگ پالیسی کے تحت اقدامات پر عمل درآمد یقینی بنائے گی۔
وفاقی حکومت نے تیسرے مرحلے کیلئے وزارت خزانہ اور پاور ڈویژن کی نشاندہی کی، تیسرے مرحلے میں اطلاعات و نشریات، قومی ورثہ، ثقافت اور تعلیم کی وزارتیں شامل ہیں، رائٹ سائزنگ پالیسی کے چوتھے مرحلے کیلئے تجاویز کو آئندہ ایک ہفتے تک حتمی شکل دیئے جانے کا امکان ہے۔
حکومت نے رائٹ سائزنگ پالیسی کے چوتھے مرحلے کیلئے 5 وزارتوں، ڈویژنز کو منتخب کیا ہوا ہے، چوتھے مرحلے میں ریلویز، مواصلات، تخفیف غربت اور سماجی تحفظ کی وزارتیں شامل ہیں، رائٹ سائزنگ کے چوتھے مرحلے کیلئے پٹرولیم ڈویژن اور ریونیو ڈویژن کو بھی حصہ بنایا گیا ہے۔
وفاقی حکومت نے رائٹ سائزنگ پالیسی کے پانچویں مرحلے کیلئے بھی کام شروع کر دیا ہے، پانچویں مرحلے کے لئے 5 وزارتوں، ڈویژنز کا انتخاب کیا گیا ہے، پانچویں مرحلے میں منصوبہ بندی، نجکاری اور اقتصادی امور شامل ہیں، پانچویں مرحلے میں اسٹیبلشمنٹ ڈویژن اور کابینہ ڈویژن کی نشاندہی کی گئی ہے۔
