اسلام آباد: (دنیا نیوز) وزارت قومی صحت اور نجی دواساز کمپنی روش کے درمیان کینسر ادویات کی مفت فراہمی کا معاہدہ طے پا گیا۔
پبلک پرائیویٹ پارنٹرشپ کے تحت 741 کے قریب مریضوں کو پہلے مرحلے میں مفت ادویات فراہم کی جائیں گی، ہر مریض کو ایک کروڑ روپے کی ادویات مفت فراہم کی جائیں گی، 10 لاکھ حکومت پاکستان اور 90 لاکھ نجی کمپنی روش فراہم کرے گی ۔
کینسرکے مریضوں کو پبلک پرائیویٹ پارٹنرشپ کے تحت مفت ادویات فراہمی کے معاہدے کی تقریب کا انعقاد ہوا، وفاقی سیکریٹری صحت حامد یعقوب شیخ نے بریفنگ دیتے ہوئے بتایا کہ اسلام آباد، آزادکشمیر اور گلگت بلتستان کے کینسر مریضوں کومفت ادویات فراہم کی جائیں گی، ادویات حکومت پاکستان اور ملٹی نیشنل دوا ساز کمپنی کے مشترکہ تعاون سے فراہم کی جائے گی، 5 سالہ معاہدے کے تحت کینسرکے ہزاروں مریض مستفید ہوں گے۔
وفاقی وزیر صحت مصطفی کمال نے بتایا کہ یہ سہولت پمز میں علاج کیلئے آنے والے اسلام آباد، آزاد کشمیر اور گلگت بلتستان کے شہریوں کو میسر ہو گی، پاکستان میں ایک کروڑ 30 لاکھ لوگ مختلف بیماریوں کی وجہ سے غربت کی لکیر سے نیچے چلے گئے۔
ملک میں 5 سال کے دوران کینسر کے ایک مریض پر 98 لاکھ روپے خرچ ہوتے ہیں، معاہدے سے پہلے آئیے پہلے پائیے کی بنیاد پر 741 مریضوں کو فی مریض ایک کروڑ روپے مفت علاج کی سہولت میسر ہو گی، یہ پہلا مرحلہ ہے، اسے مزید بڑھایا جائے گا، پھیپھڑے، جگر اور بریسٹ کینسرکے مریضوں کو سہولت ملے گی۔
