لاہور: (دنیا نیوز) پاکستان کرکٹ بورڈ (پی سی بی) کے چیئرمین محسن نقوی نے کہا ہے کہ ڈومیسٹک کرکٹ کے معیار کو مزید بہتر کیا جائے۔
لاہور میں ڈومیسٹک سیزن 25-2024 کرکٹ ڈھانچے اور پاکستان سپر لیگ (پی ایس ایل) گورننگ کونسل کا اہم اجلاس ہوا، اجلاس کی صدارت چیئرمین پی سی بی محسن نقوی نے کی۔
اجلاس میں شرکاء سے بات کرتے ہوئے محسن نقوی نے کہا کہ ڈومیسٹک کرکٹ کے معیار کو مزید بہتر کیا جائے، ڈومیسٹک کرکٹرز کے لیے کھیلنے اور آمدن کے زیادہ مواقع فراہم کیے جائیں، پروفیشنل کرکٹرز سال بھرمصروف رہیں تاکہ وہ بہتری لاتے رہیں۔
چیئرمین پی سی بی نے ڈومیسٹک سیزن کرکٹ کیلنڈر میں اضافی ٹی 20 اور 4 روزہ ایونٹس شروع کرنے کی ہدایت دیتے ہوئے کہا کہ ایونٹس کا شیڈول تیار کر کے پیش کریں جو بین الاقوامی کرکٹ کے خلا کو پر کرسکے، ڈومیسٹک کرکٹرز کو اگر قومی ڈیوٹی کے لیے ضرورت پڑے تو وہ اس کے لیے پہلے سے تیار ہوں۔
محسن نقوی نے کہا کہ ایک مضبوط، مسابقتی اور مضبوط ڈومیسٹک کرکٹ ڈھانچہ کھلاڑیوں کے پول کو بڑھانے میں مدد کرے گا جس سے پاکستان کرکٹ ٹیم کو فائدہ ہوگا۔
خیال رہے کہ ڈومیسٹک کرکٹ سیزن 25-2024 ستمبر میں شروع ہونے کی امید ہے۔
دوسری جانب پی ایس ایل گورننگ کونسل کے اجلاس میں محسن نقوی نے فرنچائز مالکان کو مکمل تعاون کی یقین دہانی کراتے ہوئے کہا کہ فرنچائز کے مالکان کو بڑھتا اور پھلتا پھولتا دیکھنا چاہتا ہوں، پی ایس ایل پاکستان کرکٹ کے تاج میں ایک زیور ہے۔
اجلاس کے دوران پی سی بی کی جانب سے پی ایس ایل 2025 کے لیے 7 اپریل سے 20 مئی تک کی ونڈو کی تجویز پیش کی گئی ہے۔
