لاہور: (ویب ڈیسک) قومی کپتان بابر اعظم اور محمد رضوان ٹی 20 کرکٹ کی کامیاب ترین جوڑی بن گئے۔
محمد رضوان اور بابر اعظم ٹی 20 کرکٹ میں سب سے زیادہ مرتبہ 50 یا اس سے زائد رنز کی پارٹنر شپ بنانے والی جوڑی بن گئے ہیں۔
انگلینڈ کے خلاف سیریز کے چوتھے ٹی 20 میچ میں بابر اعظم اور محمد رضوان نے مجموعی طور پر 24 واں ففٹی پلس سکور بنایا، بابر اور رضوان کی 24 ففٹی پلس شراکت میں سے 10 سنچری شراکت میں تبدیل ہوئیں۔
انگلینڈ کیخلاف 59 رنز کی شراکت کے ساتھ بابر اور رضوان کی جوڑی نے ریکارڈ بنایا۔
بابر اعظم اور رضوان نے ویرات کوہلی اور کرس گیل کی جوڑی کو پیچھے چھوڑا، گیل اور کوہلی نے رائل چیلنجرز بنگلور کے لیے 23 ففٹی پلس شراکتیں بنائی ہیں۔
بابر اعظم اور محمد رضوان پاکستان کے علاوہ کراچی کنگز میں بھی بیٹنگ پارٹنر رہے، دونوں کے درمیان پاکستان کے لیے 22 اور کراچی کنگز کے لیے دو مرتبہ 50 پلس شراکتیں بنیں۔
بابر اعظم اور محمد رضوان کے درمیان پارٹنرشپ میں 3227 رنز بنے ہیں جبکہ اے بی ڈی ویلیئرز اور ویرات کوہلی کے درمیان آئی پی ایل میں 3175 پارٹنرشپ رنز بنے۔
