کرائسٹ چرچ: (ویب ڈیسک) انگلینڈ کے خلاف 3 ٹیسٹ میچز کی سیریز کے لیے نیوزی لینڈ کرکٹ ٹیم کا اعلان کردیا گیا، ٹوم لیتھم ٹیم کی قیادت کریں گے۔
کین ولیمسن کی گروئن انجری سے چھٹکارا پانے کے بعد سکواڈ میں واپسی ہوئی جبکہ باؤلنگ آل راؤنڈر نیتھن سمتھ کو پہلی مرتبہ ٹیسٹ سکواڈ میں شامل کیا گیا ہے۔
میچل سینٹنر کو دوسرے اور تیسرے ٹیسٹ کے لیے شامل کیا گیا ہے، سپنرز اعجاز پٹیل اور ایش سوڈھی سکواڈ میں جگہ نہ بنا سکے جبکہ کین ولیمسن کے لیے مارک چیپمین کو جگہ خالی کرنا پڑی ہے۔
بین سئیرز اور کائل جیمیسن ری ہیب کی وجہ سے سکواڈ میں شامل نہیں۔
نیوزی لینڈ اور انگلینڈ کے درمیان ٹیسٹ سیریز کا پہلا ٹیسٹ 28 نومبر سے شروع ہو گا، دوسرا ٹیسٹ 6 دسمبر اور تیسرا ٹیسٹ 14 دسمبر سے شروع ہوگا، نیوزی لینڈ کے فاسٹ باؤلر ٹم ساؤتھی کی یہ آخری ٹیسٹ سیریز ہے۔
