اسلام آباد: (اویس عباسی) بھارت کی ہٹ دھرمی سے چیمپئنز ٹرافی کے شیڈول کے اعلان میں مزید تاخیر کا امکان پیدا ہو گیا۔
ذرائع کے مطابق موجودہ صورتحال میں شیڈول کا اعلان اگلے 24 گھنٹوں میں مشکل ہے، پاکستان کرکٹ بورڈ کے اپنے مؤقف پر ڈٹے رہنے سے پیش رفت نہیں ہو پا رہی، چیمپئنز ٹرافی ہائبرڈ ماڈل پر تسلیم نہ کرنے پر پی سی بی اپنی لائن اختیار کیے ہوئے ہے۔
ذرائع کا مزید بتانا ہے کہ ہائبرڈ ماڈل اور بھارت سے نہ کھیلنے کے مؤقف پر پی سی بی قائم ہے، سٹیک ہولڈرز نے لچک دکھائی تو پھر شیڈول کا اعلان ایک دو روز میں ممکن ہو سکے گا، سٹیک ہولڈرز شیڈول کے مطابق باہمی اتفاق کے ساتھ ایونٹ کے انعقاد کے حق میں ہیں۔
مزید برآں آئی سی سی جے شاہ کی ذمہ داریاں سنبھالنے سے قبل شیڈول کے معاملے کو حل کرنے کے لئے کوشاں ہے، جے شاہ یکم دسمبر کو چیئرمین آئی سی سی کی ذمہ داریاں سنبھالیں گے۔
