دبئی: (ویب ڈیسک) انٹرنیشنل کرکٹ کونسل ( آئی سی سی) نے ون ڈے پلیئر ز کی نئی رینکنگ جاری کردی۔
آئی سی سی کی جانب سے جاری رینکنگ کے مطابق بھارت کےشبمن گل ون ڈے کے نمبر ون بیٹر بن گئے ہیں جبکہ پاکستان کے سابق کپتان بابراعظم ایک درجہ تنزلی کے بعد اب دوسرے نمبر پر چلے گئے ہیں۔
بھارتی کرکٹر شبمن گل کے 796 اور بابراعظم کے 773 رینکنگ پوائنٹس ہیں۔
رینکنگ میں بھارت کے روہت شرما تیسرے، جنوبی افریقا کے اینرخ کلاسن ایک درجہ بہتری کے بعد چوتھے اور نیوزی لینڈ کے ڈیرل مچل 2 درجے بہتری کے بعد پانچویں نمبر پر آگئے ہیں۔
پاکستان کے فخر زمان ایک درجہ تنزلی کے بعد 14 ویں اور کپتان محمد رضوان 6 درجے بہتری کے بعد 15 ویں نمبر پر پہنچ گئے ہیں۔
باؤلرز رینکنگ
آئی سی سی ون ڈے باؤلرز کی رینکنگ میں سری لنکا کے مہیش تھیکشانا نمبر ون باؤلر بن گئے ہیں جبکہ راشد خان ایک درجہ تنزلی کے بعد دوسرے اور شاہین آفریدی ایک درجہ تنزلی کے بعد 5 ویں پوزیشن پر چلے گئے ہیں۔
نیوزی لینڈ کے مچل سینٹنر 5 درجے ترقی کے بعد ساتویں نمبر پر پہنچ گئے ہیں جبکہ ون ڈے آل راؤنڈرز رینکنگ میں افغانستان کے محمد نبی کی پہلی پوزیشن برقرار ہے۔
