راولپنڈی: (دنیا نیوز) انٹرنیشنل کرکٹ کونسل (آئی سی سی) چیمپئنز ٹرافی کا تگڑا مقابلہ آج آسٹریلیا اور جنوبی افریقا کے درمیان راولپنڈی میں ہوگا۔
چیمپئنز ٹرافی گروپ بی کی بڑی ٹیموں آسٹریلیا اور جنوبی افریقا کے درمیان بڑا میچ ہو گا جس کی فاتح ٹیم کے لیے سیمی فائنل تک رسائی آسان ہو جائے گی۔
دونوں ٹیموں نے ایک ایک میچ کھیلا ہے اور فتح اپنے نام کی ہے، آسٹریلیا نے گروپ کی مضبوط ٹیم انگلینڈ جبکہ جنوبی افریقا نے افغانستان کو شکست سے دوچار کیا تھا۔
میچ کے لیے دونوں ٹیموں نے بھرپور ٹریننگ کی، جنوبی افریقہ کے کپتان ٹمبا باووما کا کہنا ہے کہ آئی سی سی ایونٹس میں آسٹریلیا کا ریکارڈ بہترین ہے۔
انہوں نے مزید کہا کہ ٹاس جیت کر بڑا ہدف دینے کی کوشش کریں گے، پر امید ہیں کہ ہمارے فائنل کھیلنے کے امکانات روشن ہیں۔
دوسری جانب آسٹریلوی بیٹر ایلکس کیری نے پری میچ کانفرنس میں کہا کہ پاکستان میں بڑا سکور بن رہا ہے اور وہ پہلے میچ کے وننگ کمبی نیشن میں کسی تبدیلی کے حق میں نہیں ہیں۔
آسٹریلیا اور جنوبی افریقہ کے درمیان میچ دوپہر دو بجے شروع ہو گا۔
