ڈھاکہ: (ویب ڈیسک) بنگلہ دیش کرکٹ ٹیم کے سابق کپتان اور مایہ ناز وکٹ کیپر بلے باز مشفیق الرحیم نے ایک روزہ کرکٹ سے ریٹائرمنٹ کا اعلان کر دیا۔
میڈیا رپورٹ کے مطابق سماجی رابطے کی ویب سائٹ پر جاری بیان میں بنگلہ دیش کی تاریخ کے کامیاب بیٹرز میں سے ایک مشفیق الرحیم نے کہا کہ میں آج سے ایک روزہ کرکٹ سے ریٹائرمنٹ کا اعلان کر رہا ہوں اور جو کچھ حاصل کیا اس پر اللہ کا شکرگزار ہوں۔
مشفیق الرحیم نے کہا کہ جب بھی میں اپنے ملک کے لئے میدان میں اترا میں پوری دیانت داری اور عزم کے ساتھ 100 فیصد سے زیادہ توجہ دی، میرے لیے گزشتہ چند ہفتے بہت چیلنجنگ رہے۔
سابق کپتان کا مزید کہنا تھا کہ میں اپنے خاندان، دوستوں اور اپنے مداحوں کا شکریہ ادا کرنا چاہتا ہوں جن کے لیے میں نے 19 سال کرکٹ کھیلی۔
واضح رہے کہ سابق کپتان 37 سالہ مشفق الرحیم نے 6 اگست 2006ء کو زمبابوے کے خلاف ہرارے میں ون ڈے ڈیبیو کیا تھا اور آخری میچ 24 فروری 2025 کو چمپیئنز ٹرافی میں نیوزی لینڈ کے خلاف کھیلا۔
