ہملٹن: (دنیا نیوز) میزبان نیوزی لینڈ نے دوسرے ون ڈے میچ میں بھی پاکستان کو شکست دے کر سیریز اپنے نام کر لی۔
ہملٹن میں کھیلے گئے میچ میں پاکستان نے ٹاس جیت کر پہلے بولنگ کا فیصلہ کیا تھا جس کے بعد نیوزی لینڈ نے پاکستان کو جیت کے لیے 293 رنز کا ہدف دیا تھا جس کے بعد جواب میں قومی ٹیم 208 رنز ہی بنا سکی۔
نیوزی لینڈ کی بیٹنگ
نیوزی لینڈ نے مچل ہے کے 99 رنز کی بدولت مقررہ 50 اوورز میں 8 وکٹوں کے نقصان پر 292 رنز بنائے، پاکستانی باؤلرز نے اننگ کی شروعات میں اچھی کارکردگی دکھاتے ہوئے کیوی بیٹرز کو جارحانہ کھیل کھیلنے سے روکے رکھا۔
نیوزی لینڈ کے اوپنر رائس ماریو 18 رنز کی اننگ کھیل کر آؤٹ ہوئے، انہیں محمد وسیم نے آوٹ کیا، ان کے ساتھ آئے نک کیلی کو حارث رؤف نے پویلین کی راہ دکھائی، نک کیلی نے 31 رنز بنائے۔
اسی طرح ہنری نکولس 22، ڈیرل مچل 18، کپتان مائیکل بریسویل نے 17 اور محمد عباس نے 41 رنز کی اننگ کھیلی، ناتھن سمتھ 8 اور بین سیئرز 6 رنز بناکر آؤٹ ہوئے۔
ساتویں نمبر پر بیٹنگ کے لیے آئے مچل ہے نے نیوزی لینڈ کی بیٹنگ کو سہارا دیتے ہوئے 78 بالز پر 99 رنز کی عمدہ اننگ کھیلی اور ناٹ آوٹ رہے، ان کی اننگ میں 7 چھکے اور 7 چوکے شامل تھے۔
پاکستان کی جانب سے محمد وسیم اور سفیان مقیم نے 2، 2 جبکہ فہیم اشرف، عاکف جاوید اور حارث رؤف نے ایک ایک وکٹ حاصل کی۔
ہدف کے تعاقب میں پاکستان کی بیٹنگ
پاکستان ٹیم نے ہدف کے تعاقب کا آغاز مایوس کن انداز میں کیا، کیوی فاسٹ باؤلرز کے سامنے اوپنرز سمیت مڈل آرڈر بھی ناکام ثابت ہوا، آدھی ٹیم صرف 11.4 اوورز میں ہی واپس پویلین لوٹ گئی، ابتدائی 5 بیٹرز ڈبل فگر میں بھی داخل نہ ہوسکے۔
عبداللہ شفیق ایک، امام الحق 3، بابر اعظم ایک، کپتان محمد رضوان 5 اور سلمان آغا 9 رنز بنا کر آؤٹ ہوئے۔
فہیم اشرف کی مزاحمت
آدھی ٹیم کے آؤٹ ہونے کے بعد ایک اینڈ سے وکٹیں گرتی رہیں تاہم دوسرے اینڈ سے فہیم اشرف نے مزاحمت جاری رکھی اور انہوں نے اس دوران اپنی نصف سنچری مکمل کی۔
فہیم اشرف کی مزاحمت 73 رنز تک ہی چل سکی اور 37.4 اوورز میں پاکستان کی نویں وکٹ 174 رنز پر گر گئی، اس کے بعد محمد وسیم جونیئر ایک، طیب طاہر 13 اور عاکف جاوید 8 رنز بنا کر آؤٹ ہوئے۔
بعدازاں میچ کے دوران حارث رؤف ہیلمٹ پر باؤنسر لگنے کے بعد گراؤنڈ سے باہر چلے گئے جس کے بعد کنکشن قانون کے تحت حارث رؤف کی جگہ نسیم شاہ بیٹنگ کے لیے آئے۔
حادثاتی طور پر ٹیم میں شامل ہونے والے نسیم شاہ نے اچھی بیٹنگ کی اور انہوں نے بھی اپنی نصف سنچری مکمل کی، وہ 51 رنز بنا کر آؤٹ ہوئے جبکہ سفیان مقیم 13 رنز پر ناٹ آؤٹ رہے۔
دوسرے ون ڈے میچ میں پاکستانی ٹیم میں 4 تبدیلیاں کی گئی تھیں، عثمان خان، محمد علی، عرفان نیازی اور نسیم شاہ کو پلیئنگ الیون میں شامل نہیں کیا گیا جبکہ امام الحق، فہیم اشرف، وسیم جونیئر اور سفیان مقیم کو ٹیم میں شامل کیا گیا تھا۔
پاکستانی سکواڈ
قومی سکواڈ میں عبداللہ شفیق، امام الحق، بابر اعظم، محمد رضوان (کپتان)، سلمان آغا، طیب طاہر، فہیم اشرف، محمد وسیم جونیئر، حارث رؤف، سفیان مقیم اور عاکف جاوید شامل ہیں۔
نیوزی لینڈ کی ٹیم رہیس ماریو، نک کیلی، ہینری نکولس، ڈیرل مچل، مائیکل بریسویل (کپتان)، محمد عباس، مچل ہے، نیتھن سمتھ، جیکب ڈفی، بین سیئرز اور ول اورورکی پر مشتمل ہے۔
